Minestra de fasoi
  

   ______________________________________   torna indrio

          

Par quatro che magna

 

4 sbrancadele de tajadele fate in casa; (ma i le vende za fate, co l’ovo…)  

3 eti de fasoi sichi de Lamon;

1 spigo de ajo e ½ zeola;  

1 ganbeta de sèlino;

1 carota;

ojo stravergine de oliva;

sale e pévaro ;

 

         Se fa cussì:

  1. Fare on desfrito co la zeola e l’ajo el sèlino e la carota, cavando l’ajo ala fine;

  2. Cusinare i fasoi cuerzéndoli de aqua freda, insieme  col desfrito, in modo che ala fine ghe resta tanto brodo;

  3. Masenare metà d’i fasoi col passaverdura, cussì el brodo vien pì fisso;

  4. Sol brodo cussì fato, cusinare le tajadele;

  5. Par i palà pì fini, insieme coi fasoi se mete on osso de parsuto a cusinare.

  6. Servire la minestra che la scota, infromajando par ben.

  7. No ghe starìa male on giro de ojo stravergine cruo.

  8. Se calcheduni ve dirà de metare prima a moja i fasoi, disighe che'l se faza i afari sui!

 P.S.                O regina de tute le minestre,

                        che a qualchidun ti pari volgarota,

                        parché ti movi on poco le balestre,

                        lassa che te saludi a la fraiota

                        e te proclama sensa petulansa

                        la gran Regina de la nostra pansa!

                        Fissa, mora, color de ciocolata,

                        no digo freda, apena tiepideta,

                        co la so pelesina mantecata

                        e co la relativa codegheta,

                        la score zó gualiva come l’oio

                        sensa petegolessi e sensa inbroio!

                        Drento ghe xe la cara lasagneta

                        o subiotini, o tagliadele more,

                        co i so mati sporchessi de panseta

                        che, da la boca, i riva infin al cuore;

                        e zó ste scuciarade a tuto andare,

                        che apena te si bon de respirare!

                        No gh’è né fiorentini né romani

                        che sapia sfasolar in sta maniera,

                        e gnanca milanesi o maremani!

                        Solo la zente de la nostra tera

                        pol vantarse de fare co rason,

                        el vero “Ciocolato de Lamon”! 

leta sol libro “A tola co i nostri veci” (v. vocabolari, bibliografia), tolta

da “Onze de sogno” ed. Tavernetta - Padova