|
INTROIBO...
" Nel mezzo del cammin di nostra vita
mi ritrovai per una selva oscura,
ché la diritta via era smarrita... "
3
Cussì scrivendo, Dante 'l ghea paura
de no vegner pi fora dal Cansilio,
pensando che la fusse tanto dura;
6
el jera 'nda, difati, in visibilio
a védare chel posto, el paradiso,
on luogo da parlarne int'on bisbilio. 9
Noantri femo tapa, xe deciso,
co 'a nostra montanbai senpre fedele,
a Piancavalo centro, a ca' del Biso,
12
na pensionzina enorme, ma de quele
che solo a nominarle, dopo viste,
le fa rebòjare parfin 'e buele.
15
Siben che la xe comoda ale piste
a ghemo magnà male e mal servìi,
tanto da scancelarla dale liste.
18
Pa 'l resto a semo proprio refinìi
in mezo a na natura senza mace:
foreste, pra', sterati ben piolìi
21
e po' sentieri in mezo al bosco, e trace
de bestie tirà su dal padreterno,
e silenzio che mete el cuore in pace.
24
Vivare qua, lontan dal nostro inferno,
co 'e nostre montanbai, co del fromajo
e on fià de vin, par passar ben l'inverno...
ma nantro ano femo nantro rajo!
28
3
- Da "La divina commedia", Inferno, canto 1°.
12 - Ca' del Biso = casa qualunque, casa da poariti
15 - le fa rebòjare 'e buele = le fa vegnere el voltastomego
23 - tirà su dal padreterno = no alevà, salvadeghe
25, 26, 27 - ...che belo che sarìa!
28 - nantro rajo = nantra partia, nantro giro
pag. 2
El primo dì, fortuna ga volesto
che 'l tenpo fusse fato par partire;
cussita i quatro muli s'a movesto
3
dopo ver messo
in corpo, par gradire,
arquante marmelate striminzie,
on fià de buro, pan e, par finire,
6
na sgorgonà de smoje sebojie.
Na colazion da sturbo, mandà basso
par farghe fronte a tute 'e traversie
9
che 'l
programin del dì, pa' ndare a spasso,
el ghea destinà pa' i quatro duri,
zente pì scaenà de on satanasso.
12
Tirava on garbinelo, siore e siuri,
de quili che te fa vegner la joza,
ma ben vestii, par no ciapar doluri,
15
i corajusi amanti di'a caroza
i s'a introdà pa'l SAUC, na baraca
poco pì in'a, dopo na curva moza.
18
Scumizia la salita e, porca vaca,
Tomaso xe za pronto a dire aiuto:
el frena e, int'on secondo, el se destaca
21
assandose ciapare dal sangiuto
parché - quando se dise la disgrazia -
senza uciai da sole el pare bruto...
24
3 - quatro muli = Renzo, Renato, Leonardo e Tomaso
7 - smoje sebojie = cafè de orzo
8 - da sturbo = roba da poariti
14 - la joza = la joza al naso
16 - caroza = nome afetuoso par la montanbai
24 - senza uciai da sole el pare bruto = el pare bruto anca coi uciai...
pag. 3
" Li go assà in valisa - el ne strazia -
a vago a rancurarli, viento Lelo? "
E fando na smorfieta 'l ne ringrazia.
3
Tornando indrio, l'amigo - proprio elo -
el ghe confessa a tuti, rosso in viso,
ch'i uciai 'l li ga in scarsela, sto buelo!
6
malefico Tomaso... 
El li contenta tuti co 'n soriso,
ma dopo ver tacà de spedalare,
el mete tuto el grupo so l'aviso
9
che 'l canolin lo ciama par pissare.
Passienza, tusi: ghe ne vuole tanta
co uno che sarìa da strangolare...
12
Par no coparlo, fata chel'arquanta
dissesa de asfalto benvegnesta,
rivemo ala baraca e ala santa
15
salita, ca la ghivino richiesta;
on steratin, in comoda pendenza
che porta, i dise, in mezo ala foresta.
18
Rivemo, senza tanta soferenza,
a quota milequatro, forse depì,
da dove che se vede, in aparenza,
21
la vale de Aviano e intorno lì.
Pecà, però, che'l sole staga sconto
e no'l ne mostra de mejo de cussì.
24
2 - Lelo = Leonardo Sebastiani, fiolo dela Seca
(Tomaso el si'à torà
spesso co Lelo...)
10 - canolin = cicio (pecòlo, tratandose de Tomaso)
15 - baraca = la baraca del Sauc
18 - foresta = la foresta del Consigli
21 - in aparenza = par via dela foschia che no assava védare mèjo
13 - on mondo senza tara = on mondo vero, senza macia, neto, san
24 - la baraca = la baraca del Sauc
|