______________________________________   torna indrio

1. Se scumizia tuto la sera prima co on lièvore, zóvane, che xe mèjo.

2. Tajare a tochi la carne, po' métarla so na terina co arquante foje de oraro (alloro) e salvia, carote tajà a tochiti, sèlino, ajo a tochiti, erbete seche varie (on bel pìzego), el limon, prima strucà e po' tajà a tochiti e na bela zeola a fete grosse;

3. Quèrzare tuto col litro de vin (zontando aqua se no basta), smissiare ben e assare a moja par 14-15 ore (na note, insoma...), inquercià;  

4. Passà el tenpo, sgiozzare la carne dal so pòcio e lavarla, po' butarla in pignata co na zeola, na carota e na ganba de sèlino tajà a l'ingrosso;

5. Assare a fogo vivo par diese minuti, revoltando senpre, po' cavàre la carne, sgiozzarla e lavarla e butare via tuto el resto;

6. Desso xe ora de cusinare: fare on desfrito co ojo, na zeola, na carota e na ganba de sèlino, tuto tridà fin, e on spigo de ajo (da butare);

7. Tegnendo a fogo vivo, butarghe drento i tochi de lièvore e revoltarli;

8. Quando che la carne sarà scotà tuto torno, bagnare col mezo litro de vin moro speciale e farlo svaporare, po’ zontarghe na foja de oraro e on paro de basalìco, on pizegheto de timo e butarghe drento on bussoloto de polpa de pomodoro e justare de sale;     

9. Cusinare a lento, tegnendo de ocio la carne che no la ve se desfa (smissiare el manco possibile). El lièvore sarà coto int’on’ora e meza /do ore;

10. La so morte xe magnarlo co na polentina tenareta, messa par prima sol piato e inquercià co la carne e col tocio. Va benon anca la polenta infasolà (so la fotografia...);

11. Bevì quel ca volì, basta che'l sia moro e bon, de quelo doparà par cusinare!