torna indrio

Xe vero che bisogna contentarse,
che no va ben star senpre lì a lagnarse
de quelo che te ofre desso ‘a vita:
la podarìa ‘ndar pezo de cussita. 

Però, la podarìa ‘ndar mèjo, digo,
e no avere ogni dì on intrigo;
strucando la zintura oncuò, magari
doman te podarissi far d’i afari. 

Come se spiega, alora, el vecio deto
che te consiglia, oncuò, solo on oveto
pitosto che pensare a la galina 

che podarìa ingrassarte domatina?
La xe filosofia da “facendieri”:
infati, oncuò el xe el doman de jeri.

1984

proverbi in rima