torna indrio

Me piase alzare i oci, a la sera,
có ’l sole cala zo so l’orizonte
de drio de le passàje dove, sconte
in mezo a ’e rame, ruza ’e gazanele 

in amore. No stago pi so ’a pele
a védare chel rosso che s’inpiza
fando scanpare anche ’a pi tegniza
fra tute le creature del Bon Dio. 

Xe l’ora che se pensa, e torna indrio
la struma de la vita. Ma la spiera,
che se slonga in pressa, la fà da ponte

fra tuti i strèpiti del dì finìo
e ’a rèchie de la note, co le stele
che fà sperare che ’ l doman s’indriza.

2009

natura