|
Se discore, ai nostri tenpi,
de sequestri, de camora
e de mile altri esenpi
de virtù …de la malora.
Tanti zóvani finisse
drento a giri massa grossi ;
tanti omani patisse,
tanti vive drio a d’i fossi.
Se la vita ca vivemo
fusse tènara co tuti,
podarissino, pensemo,
ca sipiemo bei o bruti,
contentarse dela mana
che ne manda el Padreterno.
Ma purtropo la condana
la xe qua, no zo a l’inferno:
Ogni uno che laora
nantri quatro magna a ufo
e fra quisti, par dessora,
calchedun se ciama stufo.
Paga tasse chi ga poco,
chi pì ga no sborsa gnente.
“ Se te paghi te si on oco “,
pare dirte zerta zente.
L’eletore dà el so voto
e l’eleto, spesso, el roba;
va finire che deboto
anca on drito fa la goba.
E cussì, so ‘sto bel quadro
pien de chi se ne aprofita,
“L’OCASION FA’ L’OMO LADRO”
l’è on proverbio oncora in vita.
|
