La Creazion
laorà dal Mestro da na storiela in prosa

torna indrio

Ghe jera confusion so l'universo
e al Padreterno, Capo là dessora,
ghe xe vegnù inamente, a tenpo perso,
de destrigare el pòrtego. Int 'on ora

    
el ga tapà on cantiere so la Tera:
cognava che sta spece de balota,
che za la jera lì col sole in spiera,
la fusse fata mèjo, manco rota		  
da teremoti, fuogo, vento e piova.
Alora El la ga fata ben piolìa,
faséndola vegnere come nuova,
co fiuri, celo, mare e cussì via.
Ghe ga volesto pi de tre jornate,
ma Elo, al tenpo el ghe comandava...
Ghe ga piasésto i munti e le valate,
el posto jera belo, ma mancava
calcossa che ghe desse on fià de vita,
d'i èssari che se movesse... Alora,
El ga pensà: "adesso fào cussìta:
ghe meto de le bestie, sol dessora!" 
Par primo, el Padreterno ga deciso
che jera ora de creare el musso.
El dise: “o ben maron opure biso,
american, ‘talian, cinese o russo,

te dovarè laorare a testa bassa,
da l’alba e fin che ’l sole va al tramonto;
par ti l’intelijenza sarìa massa,
cussì te restarè par senpre tonto.  

  
Te magnarè de l’erba par canpare,
portando pesi in gropa fin ala morte,
a son de bastonà, senza fiatare.
Te toca zinquant’ani de sta sorte."
"Siorsì, - risponde el musso - ben cussita,
 ma me contentarò de vinti ani:
 mi credo che me bastarà sta vita
 vivesta fra laóro e …batipani".
"Va ben - dise el Segnore -. Adesso, el can:
a ti te tocarà de morsegare
e fare, spece la note, del bacan
se i ladri tentarà de 'ndar robare
da l’omo, el to paron, senpre contento
 de averte ti de torno come amigo.
 Se elo te comanda, stame atento
 e no desmentegarte quel ca digo,
te ghè da fare sguelto, cofà on sbaro,
cussì te ciaparè calche careza;
te magnarè i avanzi del seciaro
par vintizinque ani ". "Na beleza,
Segnore - dise el can -. Va ben, acèto,
ma podarò, mi penso, vivar manco:
me basta diese ani de l’afeto
 de sto paron che fa da capobranco."
"Bon – dise l'Altissimo – che sia diese.
Toca ala simia, 'desso, fate soto:
te vivarè vint’ani, senza spese,
saltando fra le rame, sempre in moto;
par guadagnarte on fià de sinpatia
te tocarà la parte del pajazo:
cussì a go deciso". "E cussì sia
 - risponde la bestiola alzando on brazo -;
però, vint’ani in mezo a la foresta
mi credo ca no podarò durare:
a me ne basta diese, de sta festa,
e dopo posso anca sbolognare".
"Aprovo anca el to desiderio –
 risponde el Creatore - e po' 'l se volta
 vardando drito in facia, fisso e serio,
 on tracagnoto in piè. "Ti, omo, scolta:
a ti a te darò l’intelijenza
che la te servirà par rajonare
e solo  ti, fra tuta la somenza,
te si autorizà parfin a parlare.
Le bestie sarà tute al to comando
e te le podarè anca magnare;
 te vivarè pianzendo opur cantando,
 ma tuto te avarè da abandonare
a vinti ani. A ti sto privilejo…"
"Te ringrazio – ghe dise la creatura -,
ma mi a credo proprio che sia mèjo
che la me vita sia ben chi 'a dura
on fià depì de quel che Te m'è dito:
 dame i trent’ani che 'l musso ga scartà,
 po' zóntaghe, assàndolo par scrito,
 i quìndese che 'l can no ga acetà
e par sora, Te podarìssi darme
i diese che la simia la ga perso.
Cussì, almanco, podarò vantarme
de starghe mi, depì, so l’universo.
E po' - el dise - qua da mi mi solo
me sà ca me anoiarò a la morte:
mi só sicuro, a ghe scometo el colo
che Te sì bon de darme na consorte..."
"Te ghe de le pretese, caro omo,
ma vojo contentarte e alora sia!
Ma sapi che se ti te magni on pomo
da qua me tocarà paràrte via!"
Dopo de 'verlo par ben indormenzà,
El ga cavà na costa via dal pèto
e, costo osso, El ghe ga fabricà
na fémena dal fisico parfeto.		    
  Vivendo senpre insieme, inte 'l fruteto,
i di no ghe ga messo tante ore
a morsegare el pomo maledeto.
E dopo no i ga visto pi el Segnore!
Da alora l’omo vive par vint’ani
 la vita che volea el Padreterno.
 I trenta che vien dopo – barbajani –
 el vive da sposà, int’on inferno,
portando, come on musso, el fardelo
de na fameja piena de pensieri.
E dopo, quando i fioi sol pì belo
i va par conto sóo, i xe afari seri:
el vive quindese ani come on can,
spetando la pension e a stecheto,
par po’ rivare, co le buele in man,
 a fare diese ani, poareto,
saltando, 'fà na simia, fra 'e fameje
- che i fiòi, sol fratenpo, i ga ingrandio -
fasendo el pajazo par dó streje
de neoditi …regalà da Dio.