|
Xe inverno; fa fredo; ghe
xe caligheto;
par tera ‘na spana de neve giazzada.
Vien vanti un tabaro co in drento un vecieto,
che ‘l coa da mezora ‘na grande pissada.
Beh! Infati co’l riva là in coste a un moraro,
da drio de le spale ‘l se buta ‘l tabaro
e suito ‘l cominzia, poareto, a laorare
par vèrzar le braghe e infine a pissare.
Ma co le man dure de fredo
e buganze
el perde assè presto, meschin, le speranze.
Poarin dal Segnore! Ma a un zerto momento
a forza de fàrghine ‘l se cata par drento.
Ma, ospia, ‘l mistiero, ‘ndo s’alo ficà?
Fra i brombi, sto boja, ‘l se ghea incantonà.
Beh, infati, el lo tira a
la luse del sole
E suito ‘l ghe dise trì, quatro parole;
po’ ‘l taca a sburtare vegnando fin viola
ma solo ‘na gozza la spunta, una sola.
Ciò piànzito o pìssito? ‘l ghe dise, compare,
ricordete quando te fevi incantare
le zoene, le spose, parfina le vecie
e co’ te pissavi ‘l vegnea fora a secie!
Cussita disendo de novo el
se taca
a spénzar, a fàrghine, putana la vaca,
ma gnente da fare che ormai no gh’è santi
sto boia de pisso no ‘l vien pì inavanti.
E alora rabioso el lo sbate da drento:
ma cossa combìnelo? Pensè, santamento!
Trovandose al caldo, pì caldo che fora,
el fa ‘na pissada che dura mez’ora.
Carogna, ‘l ghe dise,
carogna sfondrada
E zoso dai oci ‘l ghe fa ‘na pianzada.
Ma adesso ‘l tabaro ‘l rencura su tuto:
le lagrime, el pisso e un vecio distruto.
|
|
