Quando che manca

el manego,

anca el cortelo

no serve

a gnente.

Overo: massa confidenza el musso te peada

LA TRAJEDIA ga ciapà piega ala fine del pit-stop de Giuliano. Tuti in sela davanti al'ostaria, in pòza par partire. El Mestro dà l'ordene. "'Nnamo!", e la menoaja parte, no proprio de fuga, ringraziando la proloco che ghea smesso de piòvare. On chilometro de dissesa e po' el retifilo del Piano Grande. Ormai passà l'incazadura par el sentiero sparìo sol monte, co i oci che se inpenia del bendedio dela spianada. On nuvoloto sujerisse de manedarse a Luigino, intento a fotografare l'Italia de pini. A tiro del manejo, pressapoco a mezo retifilo, el Mestro se volta indrio par saludare Castelluccio e, senza volere, el fa la conta d'i soldadi presenti. Protone alt !  Manca uno! Come, manca uno? Chi che  manca?

Renzo! Presente. Claudio! Presente. Tomaso! Presente. Luigino! Presente. Giacomo! Presente. Giuliano! Presente. Lelo! .... Manca Lelo! Tri minuti de atesa, ma no'l se vede rivare. Che ghe sia capità calcossa? A chi, a Lelo-la-rocia? El xe 'nda vanti, decide Renzo, ma no tuti ghe crede. A perdita de ocio, né davanti, né dedrio se vede l'omo.Che no'l xe proprio invisibile. Credendoghe a Renzo, i magnifici sete restà i se rimete in moto, pontando verso la Forca del Passo. Ghe speta tri Km. de salita. Ai piè dela ranpa taca a piovisinare, cussì tuti se vestisse par l'ocasion e se mete de oja a ranpegare. Intanto Lelo no conparisse. Dopo oto-novezento metri, Giuliano dale imediate retrovie cacia on urlo: Mestro, el zaino. Porc... Voltare el fero, butarse in dissesa, rivare al luogo dela vestizion, vedare el zaino tendù da on turista, controlare drento se ghe jera tuto, rifare el chilometro in salita la xe sta tuta una. Fadigaza!

Sol Passo, na cavala gràvia vien interogà dal Mestro. Bongiorno Signora,

gala visto uno par cussì e cussì , Lelo el se ciama, passare prima

de noantri? No go visto mussi passare, la dixe. Grazie, auguri e figli

maschi.

SOTO L’AQUA , che ormai la vegnea volentiera sui nostri eori, riparà ogni uno da la so velanprina, la trupa ga scumizià a tornare indio par el sterato cancaro, bonbardà dai tedischi e anca senza cao. No ga volesto tanto, come che sucede senpre in dissesa, a rivare sol zéese de Castelluccio. Ala piova se ghe zonta, a volte, la sfiga. Anca stavolta. Ghe toca a Giuliano, senpre pronto a metarse in mostra elo e el so banco, fare la figura del panpe co na foradura soto l'aqua, in piena zona pedonale de Castelluccio. Co la squadra corse del seguito, catà rifujo soto la teza de on fontanazo inquinà, l'omo s'a messo a justare la roa. Par mazare el tenpo arquanti xe 'nda a bevare on tè in ostaria e el Mestro a protestare so l'uficio del Parco co na inpiegata indormezà che lezèa la cartina par roesso.