Traversando la spianata, dopo ver pontà la roa davanti verso el cocuzzolo col paeseto, on ocio atento come quelo de uno d'i fotografi uficiali se ne incorze che sol versante del monte, ala sinistra del serpenton de MTB, ghe xe na Italia verde, enorme. Tuti no la ga vista sùito, par ultimo el Mestro, senpre indafarà co le carte che ormai par vedarle ghe vole i ucialiti dela mutua. Ben, che roba! Calche guardia forestale inparentà co Salmaso no la ga piantà na fafà de pini in modo che i disegnesse na Italia? Ma grande,

depì de doxento metri, tanto grande che no vien fato de vedarla sùito. On spetacolo. Dito questo, bisogna contare el resto. Donca, no xe sta fadiga rivare in piaza a Castelucio. Na desolazion, se xe par questo. L'assessore al'aredo urbano de Norcia (Castelluccio xe na frazion) el ga da èssare perso, via co la testa, par no fare gnente so sta maniera. Fortuna che pì in alto, ala volta dela cesa che el grupo fa in pressa a catare, el luogo - anca se squasi tuto sbandonà - el fa on fià manco schifo. On pecà, parché el saria on paradiso. A ogni modo, sui scalini di'a cesa xe ora de supa. A seco..!

anca el conpito del fotografo uficiale el xe delicato. Fotografare on putin che ride, no fa male; fotografare i oci de on cagneto, no fa male; fotografare du colunbi che tuga, no fa male; e no fa male fotografare du morusi so na panchina, o on vecioto sora pensiero; fotografare on bel panorama, no fa male; fotografare on bel tramonto no fa male; no fa male fotografare na Ferari o na bela gnoca in bichini; fotografare el mare in burasca, no fa male; becare Renzo che'l va su a piè par na salitela no fa male. Fa scareze. Vargognate, fotografo senza gnanca l’onbra de on pelo sola cossienza...!