Lessinia 2008...926 agostoEl Mestro vede la Madona...Casella di testo: Fra onbra e sole e la fadiga che faséa 90 par via de la salita spacacuore, el Mestro se ferma ciamando Giuliano che jera tri metri pi vanti: “go visto la Madona…”

   I du pelegrini che se vede so la fotografia chì dessora - Renzo e, sconto par la vargogna, Tomaso -  i ghea finio la benzina o, forse, col motore a metano la machina no ghi’à faséa a péndare in su. Pi vanti, però, la situazion no la jera mejo. Fra Giuliano e el Mestro el jera tuto on ostiare, parché le ganbe, par quanto che le spenzesse, no le jera bone de fare ’na velocità da stare in calibrio. Adiritura, a on zerto punto, soto sforzo senza remission, el Mestro tira on zigo che mete in alarme Giuliano, lì tacà: “te fermarìssito -  el dise - lì a l’onbra?” Giuliano, ànema bona e sensibile, el se ferma de paca (bastava smétare de spedalare e la bicicreta la frenava…) domandando: “Cossa nasse?”. “Go visto la madona - zerca de dire el Mestro…”. Difati, pantezando che mai pi, el se ferma e, dopo vere tracanà squasi tuta la prima boracia, el vede davanti a elo ’na luce che - però - la xe anca in parte a elo e, parfin, la ghe inpedisse de védare in facia Giuliano. La comozion la xe a le stele, cioè, la xe conpagnà da le stele: tute le stelete che parea vegnere fora da i oci de Renato. “Chi xe che te ghe visto?” - domanda Giuliano, za preocupà par ’sta crisi mistica. Intanto el fenomeno jera finìo, insieme co l’aqua de la boracia. Sol mentre, el Mestro - tornà i sé dopo la vision - el canbia discorso, par no èssare costreto a dare massa spiegazion: co zerta zente xe mejo no farla tanto longa. El ghea visto tante luciolete, par via de on calo de zùcaro. Na sbrancadela de ueta ga fato sparire ...l’aparizion e i du batistrada se ga rimesso in pista, a pantezare oncora. Ma el pezo ghea oncora da rivare e el jera za pronto a presentarse a l’apelo, al fresco e a l’onbrìa...
Na fontanela par i AlpiniCasella di testo: El sentiero, intanto, el se ghea on fià ristreto e el jera finìo a l’onbrìa de on bosco fito, co so la destra ’na costa scavà so la rocia. Pien de sassi movisti, poco pi in suso el fasea paura. La pendenza jera oncora pì càncara e se presentava a i oci de Giuliano e del Mestro, condanà dal giudice a védare par primi ‘sto disastro, do spece de scalini de rocia che sbarava la strada. Inpossìbole scavalcarli! Proprio lì, so la destra, jera conparsa ’na fontanela, co ’na vascheta dupia scavà so la rocia e on bel spissoloto de aqua che vegnea fora dal sasso. “Fontana degli Alpini - 1932”, ghe jera scrito so ’na picola lastra de marmo, a perene ricordo de no se sa cossa. No la xe sta ’na scusa, ma i du batistrada ga deciso de fermarse par lèzare la lapide e par amirare el dupio àlbio scavà sol sasso. De bévare chel’aqua no ghe xe passà par la mente, che no se sa mai. Intanto le retrovie scumizziava a animarse e da la penonbra se tacava a védare i primi soldadi, che po’ i jera anca i ultimi, Renzo e Tomaso che, par schivare la figurazza de desmontare proprio lì davanti al monumento ai Alpini, i rivava a piè, za desmontà e tuto. So ’sta facenda vargognosa la redazion del jornale ga deciso de no scrivare gnente. Poariti!