Lessinia 2008...826 agostoFiuri par Cianosol luogo dela desgraziaCasella di testo: Zerte robe vole fate, no solo dite o, pezo oncora, solo pensà. La matina del secondo dì, a tola fin che tuti, in tiro, magnava de gusto pan, marmelata, cicolata e altro, Ciano - pena fumà ’na sigareta par catare el corajo che servìa - el assa par lasso che elo, stamatina, no sarà in fabrica par tinbrare el cartelin. Giuliano taca a tossire, el Mestro resta co ’na sculiarà de cremino a meza altezza, Renzo manda zo ’na bronba co osso e tuto, Tomaso no ga capio ben, ma ’l se adegua al sentimento jenerale. “Cossa nasse?...”, dise Giuliano in mezo a le convulsion de la tosse. Xe presto dito: Ciano, reduce dal mancamento che lo ga fato rodolare sol sentiero e basare l’erba la sera prima, el dise de vere on polso gùnfio e de no podere, par conseguenza, guidare el cavalo né in suso né in doso. “A credéa pezo”, anuncia Tomaso, senza pensare a la figurazza. “Gnente paura - dise Renzo - a ’ndemo senza de ti”. Giuliano, vizzin de posto a tola, el ghe fa na carezza, ma ’l ghe fa sofegare na torza tocàndoghe la parte ofesa. Intanto el Mestro varda le carte: “alora - el dise cavàndosse i ucialiti - tornemo pa’l sentiero de ieri e portemo du fiuriti sol luogo de la trajèdia”. Sì... Belo, anca a caoculo

   Senza Ciano, alora, e co le vetovàlie zol zaino (che par cronparle bisogna fare tute le matine on chilometro in salita e po’ zo in dissesa) i quatro restà i ciapa el sentiero che porta a Biancheri, al “Tandèeeer”, come che dise ogni tanto Giuliano e po ai Masi, traverso el boscheto co i cicramini e le foje seche. Se fermemo a la casera sbandonà, co on bel pòrtego e ’na sòja co scolpìo l’ano de fabrica: 1713. Pecà no poderlo recuperare. El trato in dissesa - fato a piè in salita - el xe on sbalo. Giuliano, par prudenza e par òrdene superiore, el se ferma par métarse el cascheto, cussì tuti lo vede fin che ’l vien zo: el sbèrega cofà na comare parché no ’l ghe vede, col zaineto che ghe peta incoste al cascheto che, cussì, ghe casca sui oci. On sbalo, chel tanto ca se ghemo desmentegà de assare i fiuriti sol monumento al caduto, Ciano.
Casella di testo: Xe sta fàzzile rivare so la provinciale, dopo vere godesto de la vista de Erbezzo - la fotografia chì in parte - che ’l xe sora on monteselo da staltra parte de ’na vale. E xe sta anca on supion rivare al ponte da dove che tacava el Vajo del’Anguilla, ca ghìvino da fare a l’incontrario. Fasèa frescheto, a l’onbra del bosco, ma par via de la salita se suava instesso. A tuti ghe xe vegnù da pensare che la crosara ca zercàvino, par svoltare a sinistra e ciapare su par la malga Lessinia, paréa che la se ghesse perso. Invezze no, la ghe jera. Lì jera za ora de ueta e marmelatine, parché ne spetava on bel dislivelo. Renzo staséa da dio, parché no ’l ghea tolto la mecheta par la glice-soa e cussì el ghea zùcaro da vèndare, in corpo. Magnà e pissà q.b., vardà la cartina nuova cronpà in paese la sera prima dal Mestro, ciapemo el

sentiero. Parlamadòna! “Speremo che ’l canbia”, dise pien de fiducia Giuliano: el ghea na pendenza da sbochi, dopo gnanca vinti metri da la crosara. E pi in su invezze ...anca. A tuti ghe vien inamente che la sera prima, a tiro ormai de Bosco, jera passà le do tosate che jera anca ele ’ndà suso par lì. “No le pole èssare vegnù su par chì”, concrude Giuliano, anca se tute do le ghea fato ’na bela inpression. Intanto la costion deventava senpre pi delicata e la salita senpre pi dura. Anca se i jera indrio de do curve, se sentìa el pantezo de Renzo e Tomaso, co tuto che, sia Giuliano che el Mestro pantezava anca ili come do màntese da fàvaro. El fondo de la mulatiera, paraltro, el jera fato de sassi movisti, come el jaron de quelo che vien doparà par fare el sotofondo par jetàre el bitume.
On jaron da rànpegare