La consolazion la xe sta de ’ver fato tanta fadiga par schivare el trafico, ma el pantézo no xe passà sùito. Ghe jera oncora da afrontare l’ultimo strapo fin a

   Semo montà in sela co la coa in mezo a le ganbe, a la volta de Cerro, dopo averghe assà fumare ’na sigareta a Ciano. Passà on chilometro catemo da nuovo la provinciale che vien da San Francesco e la ciapemo svoltando a destra. Qua ghe xe màchine, ca ghe n’emo viste poche tuto el dì. La strada xe in salita, ma senza fadighe. Giuliano cata parfin el tenpo de fermarse a sajàre de le more salvàdeghe che le cresse drio la strada: i tri condanà par contrato a stare indrìo i ga fato on laóro co i fiochi, perdéndosse la fuga de Giuliano e Renato. El grupo se ga ricatà a Cerro, a la crosara co la statale che va su a Bosco.

Qua el trafico fà paura e, par  prima roba, a zerchemo de risegare tuti i marciapiè e le murete, par tegnerse distante da la strada. Ma el paese finisse e cussì anca le protezion. Sete, i xe i chilometri che ghe xe da fare. Pian pianèlo, tabacando tuti i gas possibili sparà da le marmite de tuto quelo che passa. Come faràli i cicristi da strada a soportare ’na roba conpagna!? A tri chilometri dal paese, che ormai se vede in lontananza, ai du davanti ghe vien in mente de tajare par ’na deviazion che segnala “campo sportivo”. El xe vizzin a l’albergo Lessinia. E alora su par lì. La strada la jera streta, ma almanco el trafico jera sparìo. In canbio jera conparsa la salita: ’na salita che, man man che se ’ndaséa vanti, la deventava senpre pi càncara. Fin a la morte! A tiro del canpo sportivo el manometro del Mestro segnava ’na pendenza del 16%, altro che bale. Che, zontà a tuta la fadiga del dì, la jera ’na bestia da domare. El conparire de le prime case ne ga messo da nuovo de vena, ma fin a la ceseta che ghe xe davanti al Lessinia la salita no xe calà. Co ’l xe rivà, Renzo el xe ’ndà drito in cesa, pensando che ’na candela al Santo del luogo ghe fesse tirare mèjo el fià. Nisba!

la piazza, da dove che ’na dissesa ne gavarìa portà a l’albergo. Solo la oja de bévare la solita bira ga tegnù in sela la conpagnia. A ogni modo, par la testa passava tuto el filmeto d’i quatro dì passà a fare su i pi bei sentieri de la Lessinia. Ghe ne sarìa oncora da fare, parché el luogo xe grande e pien de sorprese. A ghemo passà quatro jornate da sbalo, pecà par Ciano che el secondo dì el ga marcà visita, bituà in giro pa’l mondo a fare quelo che ghe passa par la testa. In piazza a Bosco, ’pena rivà a jèrino tuti on fià spaesà, come se el pensiero che l’aventura la jera finìa el ne inturbièsse el zarvelo. Ghemo brindà co la solita bira, zontàndoghe, dopo zena, la graspa “baricata” che Ciano no ’l va in leto se prima no ’l ghe n’à bevù on cicheto. A l’arivo a l’albergo Piccola Mantova, ghemo fotografà on s-ciapo de gerani, par portarse casa almanco quelo insieme a tuti i ricordi. Adìo...