Lessinia 2008...2528 agostoTinazzo,paron del mondodu vecioti de guardia

   Dopo poco, ma qua el tenpo passa so ’na maniera tuta soa, tuto el convòlio xe rivà, pien de maravéja, a la Contrà Zamberlini. Sbandonà, co arquante case bele alte, una de quatro piani, parfin! Le case le jera messe una davanti a staltra, co ’na spece de corte in mezo, squasi par farse conpagnia. Xe sta ’ndando a védare la corte ca ghemo fato on incontro speciale. Du vecioti, uno co mezo toscan in boca e on bel capeleto so le vintitrè e staltro, pi alto e magro, col difeto de mastegarse le parole, come se ’l fusse inbriago. Ma la jera solo taresina, parché el paréa belo svejo. No i jera paruni de gnente, là, ma i ghe staséa de casa tri misi a l’ano, cussì, par passare el tenpo, senza gnente da fare. I jera contenti come pasque. “Qua ghemo laorà, có jèrino zóvani - ga dito quelo che ghe se inzanpava la léngoa -  a tajare l’erba. Ghe staséa ’na zinquantena de parsone, de istà, ogni una col so cònpito”. “Mi a incantonava le pi zóvane - xe intervegnù staltro, co l’oceto birbo bagnà da na làgrema de nostalgia - parché mi a jera adeto a guzzare ...i feri da segare”.

Casella di testo: In poche parole, quelo jera sta el so mondo, ’na volta, e adesso i jera qua par gòdarsio senza pensieri. “Qua semo a mile e tresento metri”, ne anuncia Renzo, dopo ’vere vardà ben la so bùssola. “Miledosentoeotantanove”, lo bacheta el spilungon, ris-ciando de morsegarse la léngoa, che la circolava par la boca senza direzion. Dal paro de vecioti, ora da uno ora da staltro, ghemo savesto che tuto quelo che se vedéa torno, prima de la guera jera de on solo paron, on zerto Signor Tinazzo, uno co on fià de sangue celeston che ’l ghea redità, no se sa ben da chi, meza Lessinia par on totale de zentozinquanta malghe, co bestie, òmani e atrezi conpresi. “Morto - el ne avisa quelo col mezo toscan incolà so la destra de la boca - morto, tanti ani fa…”. Senza farse védare, el spilungon co la parola franca el se toca i santissimi, forse pensando de tegnere distante el momento de catarse col Signor Tinazzo. Dopo ’vere savesto che, ciapando la strada che portava in suso e fati on chilometro o quatrozentosetanta metri, se rivava a Maregge, se metemo in movimento, domandàndoghe a le bicicrete de portarne su, che ghe jera oncora tanto da fare. Galantòmana, la salita, bela, larga e dolze. La ne ga portà in su, par assarne pozare l’ocio so la vale dove che i nostri vecioti jera ...deventà veci. Oltre a ili du, però, de la confusion de ’na volta ghe jera restà solo le vache, che le ghea canbià paron. De montanaròte da incantonare gnan l’onbra.