Disìvino de la cartina. No se podéa sbaliare, la strada jera justa par rivare al passo Fittanze, dove che par órdene de Renzo jera el caso de fermarse a sajare le specialità del posto. El se ricordava, “Vero, Giuliano?...”, che là ghe jera ’na baraca che ofrìa boni bocuni ai pelegrini de passajo. Anca se a Ciano no ghe piaséa de passare par pelegrin, la majoranza ga votà par consumare la supa so ’sta baraca. E no se podéa gnanca fare de manco, parché la matina no ghìvino fato el solito rifornimento de vetovàlie. Se parte, alora, convinti che, come che diséa la cartina, ormai no ghe fusse pi fadighe da fare: l’altitudine la jera quela. In montagna, però, bisogna fare i cunti co ...la montagna. Difati, par spiegarse, par on tocheto de strada no ghe jera squasi pendenza: on fià su e on fià zo al

poco-gnente par zento. Dopo, però, s’à presentà on disseson da urlo, sol sentiero che da largo el jera deventà pi streto, pi jarà e ...da corsa. El polso de Ciano ga tacà a protestare, ma par gnente, parché par lì bisognava passare. E no xe tuto! De colpo, dopo ’na curva che scondéa el resto, el trodo el tacava a ranpegarse, come se ’l se ghesse incorto de vere sbalià. El disseson da urlo el xe deventà on saliton da ...porcazzi, ca se inmaginémo solo par òbligo leterario. No se gavarìa podesto dire gnente, paraltro, parché el fià el jera messo tuto a disposizion del pantézo. Ma la xe finìa presto, par fortuna, spianando in dolze par deventare, ormai in vista del passo e de la sfalto che porta su da Erbezzo, ’na ultima dissesa.  Davanti a la baraca-tratoria tirava ’na bava che ga sujerìo de métarse la jachetela, par no ciapare malani fora stajon. El menu lo ghemo copià da na cùbia de spusiti pi larghi che alti, za sentà a tola e drio magnare ’na spiatà de pulenta, lardo e on fromajo zalo che faséa oja. Ghe xe sta calche variante so la comanda, parché Giuliano xe in dieta e, alora, gnente lardo; Renzo xe in dieta e, alora, gnente fromajo; Ciano no xe in dieta e, alora, sopressa, pulenta e sotaceti; Tomaso ga la minima massima e ghe piase lardo e pulenta; el Mestro ga le maroèle, ma ’l magna volentiera lardo e fromajo. Col pan, però. Par rapresàlia, el vento el ga robaltà la bireta de Renzo.