A la vista de ’nantro sterato, Ciano ga tacà la litania del so polso, che elo gavarìa caro de no farse oncora male, pora stela. Ma   el laóro ’ndaséa fato e la strada jera quela. Ghe jera on bel jaron, xe vero, ma el ga durà poco, in dissesa. Po’, fata on fià de salita a l’onbria, che la ghe volea, int’on colpo de man el drapelo xe rivà a la Contrà Grole. On bel postesin, ben tegnù, fato de arquante case, una tirà a spago e co tanto de nome so la porta: Baita Genziana. On bel postesin, che ne ga fato desmentegare la vista sol lago de Garda, so la strada verso la Contrà Tommasi. Fora da Grole, a dosento metri, on incrocio co ’na stradela sfaltà: “Se va par de qua, a sinistra, sete

   “Jera mejo restare a la Contrà Grole”, se lamentava intanto Ciano, forse parché ghe piaséa la porta tuta tapezzà de màscare, che gnan in Cina se ne cata de cussì bele. Ma la jera tuta ’na pantomina a la vista del sterato che, ormai in costiera al sole de mezzodì passà, el tirava che ’l paréa ’na scala da ponaro. Intanto, Giuliano e Renato i ghea vu l’órdene de córare vanti in perlustrazion, assando staltri tri a decìdare qualo che pantezava de pi. De sicuro la salita la jera dura e la strada se ranpegava senpre de pi in mezo al bosco, larga, piena de sassi movesti, assando intravédare, pi in alto, che forse la scolinava.

chilometri in salita”, se ricorda Renzo, avendola fata du ani prima co Claudio. Ghe jera anca Giuliano, ma elo no se ricorda gnente. La direzion jera quela anca secondo la cartina e, comunque, girando a Destra se podéa rivare solo in basso. La salita la jera gajarda e soto el sole, che fin a on’ora prima el jera sconto da on paro de nuvoloti. La convinzion de Renzo jera che i sete chilometri fusse tuti sfaltà, ma dopo zinquezento metri la strada jera rota. Senpre in salita, senpre gajarda, ma rota. “Epure, te ricordito Giuliano?”. No, Giuliano no se ricorda gnanca cossa che ’l ga magnà a marenda.

Ghe jera on pesto de tornanti e la pendenza la ciamava 15-16% sol manometro del Mestro. In manco de du chilometri xe ’ndà via ’na boràcia de aqua, e no se scolinava gnancora. Jera caldo assè e el sole faséa da graèla par le ganbe e i corni, parché se ghìvino cavà el cascheto e in costiera ghe jera restà i quatro penoti bianchi a farghe onbra a la coéga. A ogni modo, né Giuliano né el Mestro intendéa darse par vinti, anca se el pantezò de tuti du se sentìa -  in mezo a chel silenzio che ghe jera - come se ghe fusse on motorin de l’aqua in moto. Staltri tri ghea de sicuro catà da fare pi in basso, parché i ghea perso contato col resto de la trupa. On ventesèlo mòrbio, elo solo, el sonava ’na musica speciale acarezzando le zime d’i pini; no ghe jera, là dessora, el profumo d’i cicramini, ma bastava parfin le boazze par métarte el cuore in pace De colpo, pì in suso, la strada s’à slargà mostrando, dopo ’na ultima curva, on fià de conpassion par i du che rivava: pendenza finìa, proprio quando che jetra drio finire anca el fià. No xe sta difìzzile bévare tuto de on fià el resto de l’aqua e po’ darghe l’assalto a ’na sbrancadèla de vetovàlie da emergenza.