Vien fate milanta parole sora i scalini che jera a i piè de la fontanela d’i Alpini. Che no se ghea mai visto ’na salita cussì; che gnanca Marinelo la gavarìa fata; che vorìa védarte, Renzo, a farla in dissesa; che co chel sbrisso solo on mato. E via discorendo, de sto passo. Tute scuse par tirare el fià. In quatro altre spedalà, da lì semo finìi fora dal bosco, so ’na spece de slargo, ’na crosara che so la sinistra la ghea ’na sbara che portava so on sentiero in salita. Gnanca farlo aposta, la jera proprio quela la strada da fare. Sì, parché pa’ ’ndare a la Malga Lessinia ghe jera du segnali: questo, che diséa on’ora e meza e ’nantro che ghe jera scrito on’ora. Tomaso, pien de bon senso e scarso de bona oja, el ghe fà: “Se par de là ghe vole manco tenpo vol dire che la xe pi dura”. Inùtole spiegarghe che pa’ ’ndare a Este da casa soa se va par Sant’Elena, no par Ruigo che ghe vorìa on’ora in pi, epure no la xe pi dura. A ogni modo se fà la pi longa, parcaritàdedio...

   La discussion la xe sta longa chel tanto che ogni uno ga smesso de pantezare, come se le sbare qua le fusse messe lì aposta par fare repossare el viandante cicrista in calo de oja de far ben. Se riparte. Bela, larga e ben jarà, la jera la strada, cioè el sentiero. Ma senpre in salita, fra sole e onbra, col bosco che paréa che’l ’ndesse in su anca elo a ogni nostra spedalà. Ogni tanto el Mestro tegnea incorajà Giuliano: “ ’Nantra curva e po’ scolinemo: se vede ciaro là in alto…”, ma le jera busie pietose. Dopo ’ver visto oncora la madona, el Mestro cata finalmente rason: el sentiero scolinava, cioè el finìa fora dal bosco spianando par vinti metri. Però, sùito dopo ’na curva a sinistra, el tacava oncora a ranpegare, tuto in vista stavolta e in costiera al sole, come ’na condana. Par dispeto, Giuliano e Renato i decide de no molarghe, a costo de ...rivare de cao de sta strada “che la finirà, prima o dopo, so la sfalto”, xe sicuro el cartografo. Lota dura e coéga brustolà, però...

   La riunion del grupo in cao a la salita ga servìo a fare on spuntin a base de ueta e de mandolete varie, sofegà da ’na banana, che la scorza la serve da loàme par el prà. El pensiero core de istinto a Ciano, che co la fortuna che ’l ga el se ghea smorgà el polso al momento justo par scanpàrsela da che la sorte de penitenza. Giuliano, che ghe scanpava da pissare, el ga spetà prima de molarla, sperando che rivesse oncora la sposa cicrista. Ma ’l ga dovesto libararse in solitudine par no s-ciopare. Sarà par nantra volta! In crosara tirava na bela baveta che ga resussità i quatro eroi, za in sela dopo zinque menuti, a la volta de Malga Lessinia. Passarghe davanti bisognava par fare, dopo, i ultimi du chilometri e rivare in veta a Monte Castelberto, a 1.765 metri. Là dessora ghe xe on cao del mondo: on strapionbo de mile e zinquezento metri gajardi che fà rugolare la vista fin so la vale del’Àdese, che ’l pare pozà par tera, co in fianco l’auto-Brennero e, come ’na sbrancà de somezze, el  paese de Ala de Trento, famoso co Avio solo parché ghe xe el caselo de l’autostrada. Da l’osservatorio se vede el mondo, tuto ’torno. E anca de pi.