Dopo on viajo pien de curve, anca in autostrada, catare on paese colgà drio la statale e co tute le so strade a calti, no la xe sta na grande sorpresa. L'albergo Bertolini el jera in centro e vedarlo no xe sta fadiga. Tuto prenotà, a ogni modo, anca el garaje par le bici. Na ocià al paese, Piazza al Serchio, fa capire al'architeto del grupo che la comission edilizia la fa le riunion dopo vere travasà  el vin: infati le costruzion dela piaza le xe de stile conposito, fra l'orendo e 'l gomitoso. Poco gnente de montanaro: solo on palazoto e la cesa.

In conpenso le càmare de l'albergo le xe al quarto piano, a zinquanta scalini esati dala strada: el pensiero core sùito al rientro dai giri, pore ganbe... Dopo fate le copie, el sior Bertolini zovane ne promete che le nostre zene sarà al'alteza dele nostre fadighe. "Speremo", se sfoga Oscar, che de solito no ghe intaressa gnente de quelo che'l magna.  Apena el tenpo de descargare le valise, métare al stalo i cavai e parchejare la machina fora dala zona disco oario, e vien le oto: ora toscana de zena.

El paron de casa xe sta ciaro: "Stassera faccio io, perché l'è la giornata de 'l farro, ma un ve ne pentirete" . La taca ben, pensa tuti, chissà cossa che se magna e cossa che'l sarà sto farro. L'ortolan del grupo sa cossa che xe el farro: el xe na specie de fromento de na volta, pien de qualità. "Falo 'ndare de corpo?", se informa Claudio che'l xe stitico cofà on cavalo: "Sì, ma bisogna magnarne du chili par volta..." Paraltro! E riva el farro, in tre salse difarenti: na supa e do in salata. Tuto bon da mati. E po' el convento passa rosto de parsuto e contorni, e pastasuta de farro condia col farro e funghi e po' fromajo e dolziti de farro. Chi ben scumizia xe a metà del'òpara, dise el solito proverbio.

Quando che Lelo decide che'l vuole farse fare na cassa, tuti pensa ai pumi:. el vien fora co sta canarina poco prima de zena. Na rapida indagine e la stessa idea espressa da nantro (che no vole èssare nominà, n.d.a.) svela el  mistero. Tacà al rinomato albergo Bertolini  ghe xe na botega de ...ponpe funebri, co in vetrina - oci furbi in zerca de crienti - on toco de bionda che, dise Oscar col so solito spirito de osservazion, la xe lì par farghe vegnere on colpo a calche vecioto. E Lelo ( e staltro che no vole èssare nominà, n.d.a.), se ga inzinganà in do e do quatro. Chissà, dopo na stimana de astinenza, se'l vorà métarghe anca i maneghi de oton e quatro zate ala cassa. E staltro? La sarìa na spesa..

Come cusinare el farro e ‘ndare in paradiso.

FARRO: [Sec. XIV; latino: far farris]. Nome di alcuni cereali del genere Triticum caratterizzati per le glumelle molto aderenti alle cariossidi. Detto anche frumento vestito. La varietà più importante

(Triticum dicoccum) è originaria dell'antico Egitto e la sua coltura è oggi limitata ad esigue regioni montuose europee.Capio? Fangulo!

Magnare xe on’arte se la supa xe bona

A tola xe tenpo de