Anca le robe pì bele finisse, e cussì la permanenza dele sete maraveje so l'otava maraveja del mondo: Campocatino. Le bici le parea tirare indrio, ma bisognava continuare el viajo. "Ciao bela", dise Lelo che ghe se leze sui oci el numaro de telefonin dela bionda; "fangùlo", ghe fà eco el Mestro co l'ocio rivolto al can biondo. Solo Luigino xe contento, parché el s'à cavà la majeta bromba. Zo in dissesa l'è sta on  atimo rivare al bivio, so la sfalto. E on atimo ga volesto par decidare de 'ndare a visitare el lago de Vagli, famoso parché Mussolini lo ga fato inondando on intiero paese che desso el vien a gala ogni   uinque ani, co' i suga tuta l'aqua. Bisognava 'ndare in dissesa, ma no'l jera on problema so la sfalto. A xe sta 'ndando zo che tuti se ga incorto che calcossa no 'ndasea. Difati le bici ciapava velocità co gnente, tanto la jera

pendente. Lì par lì el jera on divertimento, specie par Renzo e Daniele ch'i ga fato i setantasiè al'ora. Solo rivà basso i sete difetusi s'à reso conto che par continuare el viajo come da programa bisognava tornare indrio par lì. Quatro chilometri co na pendenza pari a quatro Monterichi. Gnente male. Del  lago, fato come na macia de ojo vegnù male, se vedea solo na ponta, dala parte dove che so on cocuzoleto ghe jera spanpanà Vagli di Sotto. Oscar ciamava piova, viste le nuvole che bagolava in alto. El Mestro ciamava le carte che le jera via co Lelo, senpre in vena solitaria: ghe mancava za la bionda. Tuto xe sta deciso al bar del lago: 'ndare vanti volea dire rifare on toco del giro dela matina. Tornare indrio, in salita. Oscar criava.

No ghe xe sta verso de farghe canbiare idea ala giunta: se tornavaindrio. Claudio, Renato e Daniele davanti e Lelo a fare da colante co la retroguardia fata de Luigino, Oscar e Renzo. Dopo dosento metri de salita, Lelo rende noto ai batistrada che Oscar xe in crisi. Fangùlo,se va vanti instesso. La xe sta na storia sola par i tri davanti, e na storia paron par quili de drio, co Oscar che, tornà in gran forma, xe riussio a piantare in asso Lelo ormai inamorà come on pito dela bionda de Campocatino. L'arivo in veta de Renzo, che'l s'ea tardà indrio a suare, ga segnà la fine del'esperienza spacacuore. Fadiga totale: quatro Monterichi. Consumo:  sete marmelatine .

El seguito dela gita prevedea na dissesa sfaltà, e la dissesa sfaltà i sete cavalieri inboca. I xe rivà senza fadiga al paeseto de Gorfigliano, dove che li spetava na gran confusion: no de zente, ma de strade. Bisognava catare on negozio co d'i archi rosa e da lì on ponte pa' 'ndare su ala frazion de Verrucolette. L'incarico de fare luce xe sta dà a Claudio che, da bravo postin, el ga domandà l'indirizzo a na sposeta del luogo: "Sposeta", el dise, "Sapete voi ignonde che se trova Varicocele ?". "In mezo ale ganbe, sior: vuovi gunfi !"