Dal piazaleto dela cesa de Roggio, guadagnà co tanta fadiga, se godea na vista da làgreme: on par de monti fodrà de castagni e, dedrio de quiesti, na Montagna fata de marmo de Carara che fasea da sfondo. Apena in vista l'ataco del sentiero che gavarìa vu la fortuna de issare pestà dale roe d'i nostri.  Anca la dissesa dala piramide de Roggio xe sta memorabile: massa bele le stradete strete, ripide e pavimentà de piera. Da Roggio el sentiero, anca se ben tegnù, el jera tuto in salita, ma

acetabile. Ogni tanto la fila se slongava, parché calchedun sopratuto Renzo - el se fermava a suare pì del normale. Luigino no jera del verso ju- sto, ma el jera senpre a culo d'i batistrada; Leonardo, inveze, el ghea na jornata solitaria e ogni tanto el corea vanti. La salita finìa proprio davanti a on capitelo incolorio de rosso, co tanto de altarin pien de fiuri, ben tegnù come tuti scaltri capitei. El bosco, in- veze, no ghe jera quasi pì e la vista se pozava so la montagna fata de marmo de Carara.

Dopo el sterato l'inprovisa conparsa dela sfalto porta anca el problema de decidare. Ghe jera on incrocio co strade varie e bisognava catare quela che portava su a Campocatino, dove che la carta consiliava de fare na capatina, deviando dal traciato del giro. La jera sconta, la strada, de drio de on cartelo che parava su a Campocatino; na strada

sterata larga, pendente e costejà de maronari. On chilometro de rànpego. Ma che deviazion, tusi ! Sola colmegna dela salita el sentiero tirava a destra, passando in mezo a i ruderi de do casete; pì vanti, nantro grupeto, senpre de ruderi, e altri a destra e a sinistra. Inprovisamente na sbara e, delà, na vista da cavàre el fià. Finia tuto: el sterato, i ruderi ingrumà a mo' de paeseto, la salita, la dissesa, la fadiga. Xe bastà passare la

sbara e, tràchete, el mondo canbia fisionomia.Davanti ai sete basà dala fortuna, on prà squasi rotondo, largo tresento metri, pian, verde, tosà cofà na piegora in primavera. A destra, sparpajà on fià in salita, na diesena de casupole sbandonà - no tute - picole e fate de piera; a sinistra el prà in salita verso el strapionbo da dove che se vedea el lago de Vagli; davanti, oltre la spianata, na sbrancà de Alpi Apuane, alte, bise, enormi. Solo na cesa messa in piè da on inpresario inbriago pagà da calche prete inbriago e autorizà da calche sindaco inbriago se ghea intromesso par sassinare la vision. Par dispeto del projetista i sete del'avemaria s'à messo a magnare sui scalini. Solo Daniele, che'l se ghea tardà a pissare fin che staltri preparava la tola, xe riussio a evitare el sacrilejo parché, al so arivo, ala mensa no ghe jera pì mortadela. Ghe jera pan. Seco.

Una dele casupole la parea abità: fora da na portesina bassa ghe jera na tosata bionda, ben messa, che la ciaciarava al telefonin, assistia da on can biondo, grande e grosso. Lelo, da bon scapolo senpre in cacia, s'à fato soto a contarghe quela del'orso. E, par solidarietà, anca staltri se ga presentà ala porta par dire la soa. Ultimo, el Mestro che'l se ghea tardà par concimare l'unico pin dela spianata, soto l'efeto del desser de Mirtili de Bertolini. La tosa, rajunta durante i discursi da so pare, contava de quando che Pieracioni ga girà là dessora el filme "Il mio West". "Stronzo, càncaro, ladro e ludro", lo ga definio el pare, evidentemente amigo par la pele de Pieracioni. Rapìo dala parlantina del toscan, che ormai no assava pì fiatare la fiola inamorà de  Lelo, el Mestro xe sta ocià dal can biondo, peso  novanta chili, de sicuro in vena de scherzi. El s'à salvà - el Mestro, no el can - dala gioia esajerata dela bestia solo metendo in mezo la bici, che el can ga capìo che no la jera on osso. La tosa ga ridesto. Tuti  ga ridesto.  Ma no el Mestro, che par fortuna el ghea pena cagà.