Se no fusse parché la jornata la xe na fola, la situazion che se presenta ala matina, a colazion, la podarìa risultare grave. Ocore spiegarse ben. I curiduri del'ano passà se ghea bituà a védare Claudio che ala sera el tirava fora na scatoleta mora co dentro na pòlvare in gran de colore maron, el ne inpenia on sculiarin e, fasendo la facia del putin che tole l'ojo de rìzeno, el'ingiutia el tuto co on fià de aqua. Stiticheza. E anca ai ingorghi de Renzo la conpagnia xe bituà. Sempre lunghi, ma risolti par el mèjo. Ma sto ano la conbricola ga altri conponenti che, prima de partire, no i ga fato presente ala direzion la so situazion de salute. Grave (el silenzio, no la salute). Nasse, alora, che el rajoniere generale del grupo on poco al dì el fà savere de no èssarse liberà dela zavora interna. Donca: oncuò xe mèrcore e el boletin medico del dì dise "NixKaghen". El Mestro, bituà ala precision, el fà du cunti: domenega, luni e marti, uguale tre zene, cioè uguale tre, tre siè e tre nove pastassute, tri secondi abondanti, siè contorni, e anca

tre cope de mirtili col gelato e tri cafè, oltre che do colazion e du pranzi al saco.. Al'incirca on metro cubo de paston passà sol'intestino e oncora lì in bojo.  Diagnosi:  intasamento grave; pericoli: esplosion iminente; terapia: purga imediata uso violapa. Magnare e partire l'è sta on lanpo. La carovana ciapa sùito la strada in dissesa pa' 'ndare fora dal paese, verso Casciana. Le indicazion le vien dal fornaro del luogo, che po' i jera du, identici. La prima sorpresa del viajo la vien pena passà el sotopasajeto dela ferovia. Ala ciurma ghe se para davanti on ponte romanico-medievale, streto e alto, mantegnù ben assè (v. foto).  Na gioia montarghe su e po' butarse zo a capofito da staltro cao. Fare Fotografie xe sta obligatorio. Taca da lì el viajo vero e proprio. In salita  gajarda par la sfalto, in mezo a calche orto, po' a calche canpo e, finia la sfalto, in mezo a on bosco de ròare.   A Cascina no xe sta comunque fadigoso rivare. I gitanti, fra l'altro, se spetava de catare de mejo, date le descrizion dela guida fornara, ma el paese no jera on gran che: on borgo vecio, co la piaza invasa da ...tuti e dòdese i vecioti del paese. In alto Leonardo, domandando permesso in perfeto ingrese, el xe 'nda so na cortesela privata ingrese par vardare el panorama. Italiana, la vista. Da lì se podea amirare Cascianella, so nantra altura. Via ala volta del'altura, alora, chi'à parea meritare na visitina.

La paura

de rapresalie

del'intestin  de

Luigino.

Ghe xe on ponte de

mile ani da passare.

Do zuche,

du quintali:

Renzo se agita.

El destin d'i

paesiti medievali.

Anca Lelo parla

ingrese.