On divorzio ruina la pace in fameja

Da quota 1.034 a quota 842

 

Senza el brontolò del vecio alpin - pora ànema - e co Lelo tacà al biberon co l'aqua, e co Oscar che par quanto che'l vardesse in su no'l vedea nuvole, e co Luigino che no'l ghea parole par dire quanto che'l jera contento, e co Renzo che'l suava oncora anca da fermo, e co Claudio convinto de vere sbaglià giro par la posta, e co Daniele che a ogni fermata ghe vegnea da telefonare in cantiere (ma el ciciolava a bassa ose e quindi chissà se'l jera proprio el cantiere), e co'l Mestro convinto che fusse merito soo se la Garfagnana de sto primo dì jera bela assè: co tuto questo taca la dissesa verso el Passo dei Carpinelli. Sfalto patoco par du chilometri.

Aqua, cascheto, bicicreta e quanto altro e zo ala volta del passo. Calche Km. de sfalto par rifarse de tuto el sterato che magari ghe ne fusse oncora. Pendenza del diese par zento che ga fato celebrare la velocità de ogni uno d'i cavai del branco. Al passo, le carte disea de passarghe in parte a on oratorio ( noantri i ciamemo capitei ) e de ciapare el sentiero che se presentava a destra, in salita. Afare fato. Xe strano come che da na strada statale, co tanto de trafico gajardo, se possa  passare in pochi metri sol bosco pì fito e in mezo al silenzio pì grande. Passava sti pensieri par la testa, 'ndando su in salita, pantezando on fià. I sete sacraminti spedalava oncora de oja, anca se jera ormai le tre. A on bivio xe sta obligatorio decidare el da farse: girare a sinistra, in dissesa tenica ( come che sujeria la guida) o girare a destra in salita tenica e 'ndare a védare el lago de Gramolazzo, fora dal'itinerario, slongando de arquanti chilometri. "Verso l'ignoto, a ris-cio che piova" secondo Oscar che ghea apena scumizià el triduo par fare inuvolire el cielo. Parfin Luigino xe sta d'acordo che valea la pena de védare el lago. "Alora se va su", xe la conclusion del cartografo, afiancà par l'ocasion dal'architeto par via dela so vista pì bona. E fu bene.  El sentiero 'ndasea su, ma dopo on chilometro ga tacà la dissesa che fin ca ti'o digo, incrosando na strada sfalto, la ga portà la carovana fin al lago. Picolo, ma belo assè, colgà in mezo a on verde da sbochi, co in fondo na feta de zime dele Alpi Apuane e sol piazaleto na co-

pia de ospiti del nostro stesso albergo."Te go visto a tola", dise elo a Lelo, vardandolo coi oci lustri senza farse védare dala mojere. On sguardo che no ghea gnente de bon. Atento, Leonardo! Fortuna vole che no'l dorme da elo solo... A ogni modo el tipo, pur ciacolando massa, el xe sta disposto a fare na fotografia al grupo. Sucede quasi tuto al'inproviso. Uno sente na joza, staltro anca, l'amigo de Lelo conferma e Oscar òrdena el ripiegamento de drio dele linee.Manca siè chilometri a Piazza al Serchio e drio la sfalto, praticamente in piano, i sete prodi se mete uno dopo l'altro, come le perle de na colana, e i spedala ala morte sperando de schivare el grosso del tenporale. Namerda. Aqua fin casa. Oscar pare che'l si'à rida soto i bafi.

El grupo al Lago Gramolazzo

Projeti pa’l futuro...

'Ndando su par i zinquanta scalini del'albergo vien a gala na question. Oscar no vole pì dormire co Luigino, nonostante i tapi par le rece ricevù in regalo. La scusa uficiale xe che el rajoniere russa e, pezo oncora, el continua a fare Frrrr Frrrr anca dopo i richiami del conpagno. Ma i oci gunfi de làgreme de Luigino assa intendare che la copia no ga pì gnente da dirse. No ghe xe futuro, cogna divorziare. Par benevolenza l'albergo Bartolini ofre nantra càmara a Oscar. Frrr, Frrr, cria Luigino.

La vergogna no ga età