Le decision che

conta vien tolte a

volte insieme.

La visita al

Santuario,

fora dal programa,

xe sta benedia da

tuti.

Anca da Lelo,

ormai dissetà.

On alpin toscan che vien

OSCAR GA SONO

La salita de sfalto la dura calche chilometro e la viaja prima in mezo a pascoli da fola, co on sfondo de montagne de colore verde cicion, e po' la se inoltra so on bosco de fajo da cavàre el fià. I sete magnifici, senza Jul Brinner, paraltro, decide de farse na fotografia, anca se l'ocio vede mejo, quando ch'i passa soto na galeria de faji alti 30 metri. I àlbari i pare piantà lì aposta, come s'i 'ndesse a uso viale verso na vila da siorazzi. E inveze el xe on toco de bosco. On spetacolo. Luigino, in vena de parole inveze che de contabilità, el fà na dichiarazion senza rediti: "Xe questo ca intendo mi, quando che se dise Montabaic.Varda che posto, senti che silenzio". Galo torto?

Dopo el passajo del bosco, la strada torna fora sui pascoli, dove che on agriturismo senza cusina propone giri in cavalo. "No la xe roba par noantri", sentenzia Oscar come se'l ghesse bevù l'oio de merluzo; tuti xe comunque dacordo che xe mejo el cavalo co la caena. Fasendo ste riflession filosofiche, la torma de baikari la se cata, so on pra in alto a destra, na specie de monumento. El xe on monumento ai alpini caduti in guera. Visita imediata: forse ghe xe anca na fontana. "E na branda", ghe sbrissa de dire a Oscar che, palido par la vergogna, el confessa de vere sòno. Nissuni fin a chel momento saea che la varesina desse problemi col sole oncora alto. Intanto Daniele se buta par l'erba in dissesa, fiutando aqua, seguio da Lelo.

Fache- simile

   del Santuario

dela Madona

dela Guardia

 

 

Zo dal pra se presenta on piazale enorme, co da na banda na specie de antuario e da staltra na specie de ristorante-bar. I sete assetati cata anca on rubineto, tegnù a bada da on can da cacia spinon che'l ghea l'aria de ver fato la note. Al bar i vecioti se òrdena on te caldo - fora ghe jera 27 gradi! - e, tuti, se concede on fià de riposo sol piazale. No lo ghìssili mai fato ! I xe sta circondà da on vecioto in vena de discursi, partìo in tronba a parlare dopo che Renzo ghea domandà che posto che'l jera quelo. "Mi so on alpin toscan de Udine co la brigata julia in guera quindese disdoto e quelo xe el monumento a noantri alpini caduti che prima o dopo morirò anca mi ma la madona dela Guardia che questo xe el so santuario proteje tuti che ogni domenega qua ghe vien tremiladosento persone e i assa on casin de carte e i pesta l'erba come ca vedì portando via anca le parole scrite sol monumento de bronzo le parole no el monumento tusi zovane che no i sa dela guera e ili no ghe ne ciava gnente fangùlo" (tradoto dal toscan, n.d.r.). Ga volesto vinti minuti prima che'l tasesse chel tanto che Renzo ga fato stare do parole: "Noantri 'ndemo via, rivederci".