La guida dela Tamari Edizioni in dotazion ale nostre trupe consiliava de far on salto a visitare i resti - scoperti da calche ano - de on vecio ospedale militare: "Poche decine di metri oltre l'oratorio si stacca un sentiero...". Alora: l'oratorio i nostri lo cata e a on metro da questo (no poche decine) ghe xe on sentiero. E su, pa'l sentiero che'l dovea "...portare in breve ai resti...", ma dopo arquante spedalà el finisse so on spiazo co tanti fazoletini da naso: classica torara al'aperto. E alora zo dal sentiero. Intanto Renzo, senpre pien de premure, se ofre de provare pì vanti, ma fate poche decine de metri no ghe xe gnente, e cussì va su tuti. A poche decine ala volta, de metri i ne fà milanta, ma del sentiero che ghea da stacarse gnan l'onbra. E alora, Cossa se fà? "Mi go sen, fangùlo el sentiero e anca l'ospedale", ardisse de dire Lelo, co i papari pieni de crepi par la sen. Fangùlo pure, risponde el coro co siè falsiti difarenti. E cussì, via a cacia de aqua. "Parché no 'ndemo visitare i ruderi?", interoga Oscar che riva par ultimo. Nissuni ghe risponde parolazze, ma ghe xe libertà de pensiero.

Dopo la supa e l'esibizion del'architeto, se gira i cavai e se taca la dissesa, par tornare sol sentiero maestro (ve ricordeo dela deviazion pa'l rifujo?). A tuti ghe parea che la dissesa fusse pì longa dela salita. Ma bela assè, però: pendente e gajarda ma no massa. Al bivio de prima el branco riva ala spiciolata, parché anca la dissesa  spartisse el mucio. Da lì taca nantro par de chilometri de su e zo, senpre sterato, fin a on trivio, dove che la cartina dise de ciapare in dissesa, verso la prossima meta. Sol posto, na fontana seca fà incazare Lelo, senza aqua da on'ora e co na sen da mulo. "La colpa xe del Mestro, se intende", dise Lelo fora de elo, parché

ghe parea de vere capio che el nochiero saesse minuto par minuto dove e quando fare aqua. A ogni modo jera urgente catare aqua, anca par staltri, parché la salita fata fin lì la jera sta tanta e 'l motore ghea consumà tuto el liquido de rafredamento. Soluzion: zo de tuta fuga verso l'altipiano del'Argegna. "Ghe n'è aqua ?"; "No lo so". Fangùlo !

Supa al saco al’albio del Monte Tondo

Leonardo ga sen