pag. 1  pag. 2  pag. 3  pag. 4  pag. 5          album dele fotografie

          
             vista so Folgaria dal  M. Finonchio (pag. 5)

                        Dela serie:     "CHI NO VIAJA IN CONPAGNIA XE ON LADRO O NA SPIA"

                             La quadriconbricola de montabaichisti senza macia e senza paura presenta:

                     SPEDALANDO IN FOLGARIA, IA, IA, OH!...

                     sototitolo: Oscar, Renato, Renzo e, diobonin, Tomaso in sela in òrdene alfabetico ch'i viaja 
                             dapartuto sui altipiani de Folgaria, Lavarone e Luserna che piova o che no piova.

                                                esatamente dal 2 de setenbre al 5 de setenbre del'ano 1996

  GIRO  DEI  FORTI  N. 1

                               LUNI, 2 Setenbre 1996

    Col tenpo che tànbara ormai da tuto l'istà, no se spetemo gnente de bon, oncuò che'l xe el primo dì del viajo de sto ano.
    Mai corajo.
    Coi ani, paraltro, el solito portapégola del grupo, Oscar, el ga inparà a fare senpre mejo l'oselazo: oncora prima de rivare a Folgaria el ga scumizià a ciamare piova.
    Se ne incorze anca Tomaso, l'omo nuovo dela conbricola, che par tuta risposta el se palpa i santissimi, ma solo par farghe dispeto ala scarogna.

                          Piova d'istà, beato chi che la ga   

    Ma oncuò no piove, par la miseria.
    Ala facia de Oscar.
    El cielo, difati, el xe biso che mai pì, co solo do petolete de celeste gnanca tanto cargo.
    " Massa nuvolo, no pole piòvare", xe la sentenza deTomaso.
    Ne fa ben a tuti che elo sia sicuro, cussì magnemo quelo che passa el convento e partiemo.
    I quatro cavalieri dela M.T.B. ruspante, al'ataco dela prima fadiga dela setimana "santa", el GIRO DEI FORTI, scrito anca sol libreto che Renzo ga vu in prìstio dal'amigo Luigino Rag. Garavelo, invidioso come calcun altro...
    Squasi subito pena partii ciapemo paura.
    El cartografo de corte el se ghea tegnù in mente el primo cao del percorso, ma el ga sbalià tuto, forse a causa dela taresina. 
    Cussì ne toca fare 4,5 Km. in dissesa (sfaltà) prima che ghe vegnesse di dubi a elo e a Oscar.
    'Ndando vanti cussì semo sicuri de rivare a Trento, no al Passo Coe...
    Risultato: vergognoso dietro-front, che serve a scaldare i muscoli, za congelà par el sùsio dela matina.
    "Lo saèa mi: sbaglio numaro uno! ", sentenzia Tomaso, costreto a desvestirsi subito par no mandare in bojo la pignata prima del tenpo.    
    No'l farà altro tuto el dì: on continuo cava-e-miti, par via del caldo in salita e del garbinelo in dissesa: abbigliamento "a cipolla", apositamente fato aposta par tuti i atreti ciclisti, come che dise Oscar e Renzo.

    Femo presto a catare la strada justa, verso SERRADA, sfaltà fin al Belvedere e rota, svoltando a sinistra, na volta rivà so sto posto.
    Ghemo da rivare al FORTE DOSSO DEL SOMMO.  
    El tenpo pararìa che'l volesse fare el galantomo. 
    " Ma in montagna no se sa mai", dise Oscar par tegnerne sola corda.
    Desso se vede on fià depì de celeste.
    Oscar insiste: "Se piove tornemo indrio".   

                                      El tenpo e i siuri i fa quelo ch'i vole luri.   

    "Va in malora", ghe vien da dire a Tomaso.
    "Si", conferma in coro Renato e Renzo ch'i lo soporta da zinque ani.
    Dopo on chilometro catemo oncora la strada sfaltà, come che xe scrito sola cartina che el Mestro se mete a lèzare, cavandola dal zaino de Oscar..
    Na veciota in vena de ciàcole, che la dise de essare sol posto da pì de 43 ani, la ne conferma ca semo sola bona strada: "atraversatte la strada e ciapatte il sentiero che sale in suso a destra pì vanti".
    Si, Signora. Grazie, Signora.
    "Vìdito, Mestro, che a domandare se fa senpre ben?", sentenzia Oscar el sajo.
    Via.   

    Tomaso se ferma par desvestirsi, cavandose quelo che intriga e metendose quelo che serve: anca se'l tarda, però, ghe riussirà de restare indrio instesso.
    Intanto catemo el carezon de montagna, che se ciamarìa sterrato:  na strada militare strongàrica fata in tenpo de guera; la ciapemo volentiera pur de slontanarse da quela sfaltà, anca se no ghe xe machine.
    La xe in salita.
    "A queste dovìvino rivarghe", brontola Renzo che ghe ciapa on ataco de vena bona.
    La salita xe dolze. 
    Speremo che no ne vegna el diabete.
    Renato fa savere de ver fame e Renzo, inveze, se lamenta de no ver fato in tenpo de liberarse e de ver tegnù in parte massa capitale.

                                      Culo che caga no ghe xe oro che lo paga

                                                                                                                                                  Torna su...