La gravità del fato la xe quela

che'l Mestro, senpre pronto ala querela

e a catarghe mende a tuti quanti,

stavolta, no ghe xe madone o santi,

el la ga fata fora dal bocale

perdendo la cartina drio al rivale.

Fortuna che la sera 'l se ghea studià

 - co Luigino, Renzo e la cubià -

el giro del dì dopo, el secondo,

che'l ghea da bordezare tuto intondo

al nostro caro Amiata, sta montagna

che solo a mezonarla se guadagna.

E no xe tuto: calchedun ga visto

che l'omo s'ea vestio da poro cristo

mostrando in trasparaenza dae braghete,

come na femena che mostra 'e tete,

la sfesa che ghe xe fra le culate:

na vista bona gnan par di'e tosate!

El giudice de gara, lì sol posto,

a costo de far cunti senza l'osto,

el ga deciso so du piè che cogna

cavarghe du punti par sta vargogna

e darghe di'e bastonà, come al mulo,

parché par strada no se mostra el culo.

 

L’anelo medio del Monte Amiata

DONCA:  dopo le aventure del primo dì el secondo s'à presentà pì belo che mai. Tiziano dise de vere dormio e de vere smaltio la simia del primo viajo, jutà anca dala zena, che elo ghe ga fato onore magnando come on camionista e on fachin del porto missi insieme. Renzo e Luigino, senpre ale prese co la discarica interna, ma pinpanti pì che mai, anca se invidiusi de Claudio che ghea za concimà el racolto. Col Mestro, che dopo dosento metri el ghea za perso la cartina studià tanto attentamente la sera prima, el drapelo - comunque poco convinto del traciato—decide de 'ndare ala pro-loco par zercare dele informazion mejo. Catà la Pro-loco - che la xe drento ala corte dove che na volta ghe jera la miniera de mecurio - la tranquilità del grupo vien sùito messa ala prova. De solito tuti ghe assa al Mestro l'onore de ronparse le bale par zercare informazion, ma questo Tiziano no lo sa, opure el vuole fare on golpe. Fatostà che, pena drento ai ufici el novizo, cometendo, anca a dito de Renzo e Giuliano, on vero e proprio sacrilejo, el taca a discorare co la pro-lochessa e a domandarghe questo e quelo, come se i fusse afari sui. E parlando in talian, anca! Al Mestro ghe ga tocà fare solo la domanda de riserva e a farse dire nome e indirizzo de uno del posto che conosse ben el monte Amiata. A 'ndare fora Tiziano xe sta el primo e a saludare e ringraziare la pro-lochessa ghe ga tocà al Mestro. Fortuna che in corte Renzo e Giuliano ga fato la parte del giudice e i ga mustazà el tosato senza rispeto che, come tuti i tusi, inveze de scusarse el s'a messo a fare el siòparo del silenzio. (Jera ora che'l ghe tasesse on fià!). La direzion dela partenza jera comunque decisa e, al'ingrosso, anca el giro (jera previsto l'anelo medio del'Amiata); quelo che no se podea decidare jera quala  strada ciapare, anca se la cartina in dotazion la costava tredese euro. Par gnente, ma i lo ga savesto dopo.