De tusiti ghe ne xe dapartuto,

ma no xe questo quelo che xe bruto;

la question nasse quando che le gnole

le fa calcheduni che dale scuole

i manca ormai za da quarantani.

Stè tenti, no parlemo de malani,

(quili se conbina a tute le età),

quelo che stavolta a diremo qua

xe che uno di nostri pelegrini

na bela matina, come i putini,

ga tacà a fare 'n saco de caprici:

che elo no vole montare in bici

se prima no se tole par marenda

- e lì el mola anca na scresenda - 

almanco on panin co 'a mortadela,

che elo no 'l ghe vive senza quela.

A Claudio, adeto al vetovagliamento,

deboto ghe vegnea on mancamento:

" ma come, no se ghea deciso tuti

che se magnava solo on par de fruti,

na marmelatina e de l'ueta?

Anca metendone solo na feta

de mortadela, quanti schei vien fora?

Cussì le me sostanze va in malora!"

Elo ga in mente i schei, e la salute?

" Sa ghi da dire no, disìle tute...",

se incaza el rajoniere capricioso:

sì, ghi capìo ben, l'è elo el toso

che more dala oja de afetato.

Ma no te vidi, bruto sbuderato,

che te ghe za de l'onto che te cola!

 "A mi la mortadela me fa gola",

el dise; po', partio senza retegno

el entra in botega e lì 'l fà on segno

ala sposa che jera drio del banco:

"la ghe ne meta mezo eto almanco!".

Par la vargogna, pì vanti sol bosco

col panin i ga mandà zo on rosco.

EL cartografo, come ultimo giro ga consilià de portarse so staltro versante del monte Amiata, quelo che varda la Val D'Orcia. Ghe saria sta da fare on fià de sfalto par portarse in quota, ma drio on trajito poco frequentà. I indijeni spiega la direzion da ciapare e i sete aventurieri la ciapa. L'alegria la xe a mile, parché anca questa jera na jornata bela assè. El posto da rivare se ciamava Vivo D'orcia, a manco de mile metri de alteza. Assà la statale che portava fora da Abbadia,la garavana ga dovesto svoltare su par na salita, che za dai primi metri la se fasea dare del vu. Ai primi metri se n'à zontà altri, squasi domila, che ga portà el convolio fin a miledosento metri alto: che, sendo partii da manco de novezento, fà tresento metri e pì de dislivelo e, par forza, el quindese par zento e pì de pendenza. Chi che no ga provà, che'l prova!  On incontro fortunà ga fato ciapare fià ai ranpegaduri, che za i suava in costiera al sole gajardo de meza matina. Drio la strada ghe jera arquanti alevaminti de porrei stranbi, ch'i parea vestii da prima comunion, co tanto de abito biso e on nastro rosa tuto torno la panza. Le informazion racolte sol posto disea che i jera de na raza (la Cinta Senese) co l'anema sui cavaliti, drio estinguarse insoma, ma tegnù in viva da apassionà de saladi col nastro. In alto, na sosta par metarse la majeta di'a salute, parché par rivare a Vivo desso ghe jera dissesa ( ma no i podea farla tuta in dolze?). Rivà, fin che'l Mestro studiava le carte Luigino ga recità la pantomina del panin, che se no i ghi'o tole el taca a criare, e no xe fato ben qua, parché el paese xe picolo. Le informazion par continuare le jera on casin. S'à messo in mezo parfin uno col parkinson a spiegare dove che jera le cascate. On primo tentativo xe 'nda sbuso, parché el sentiero finia so na ponta. El secondo tentativo xe sta par darghe reta a on grupeto de pensionati: traversé el cantiere, po' 'ndè vanti, po' 'nde su e ai du pilastri 'nde senpre vanti. Par

lì se va sol monte. E alora via, par na passarela del cantiere che jera drio setarare,  lì sol posto, l'acquedoto del paeseto.

Fin che'l Mestro e Giuliano, in calibrio so na tola, ciuciava informazion da on stradin in busa, Tiziano - mai bon star fermo - el salta i du e, sol tentativo de metarghe la lengoa sol discorso, el se ingamela fasendo cascare ...el casco sola testa del'operaio e, quindi, in busa. La classica biastema toscana no la se ga sentia, ma la xe sta mastegà de sicuro. Del fato no se ghea incorto staltri, oncora inpegnà so on passajo difizile in cantiere. Ma 'l Mestro ga spanto ose.