E Claudio e Tomaso senpre insieme...

Sentì, vu ca lezì, ma no ve preme

savere come mai el nostro postin

de colpo 'l resta indrio, senza morbin?

Che'l gabia fato on pato co 'a Doriana

de tèndare Tomaso, sta 'stimana,

in canbio de cafè par tuto l'ano?

Che'l gabia messo i freni sol volano?

Opure xelo on fià sora pensiero

cussì el resta a culo del sentiero?

Credo, dise Giuliano che l'è informà,

che 'a fémena lo gabia mustazà

parché no'l vole pì farghe ...la ponta

da quando che la ghe ga dà na onta!

Co ste domande, passa na mezora

- el tenpo che'l ne riva sol dessora

de chel sentiero perso ormai del tuto -

che Renzo 'l ghe dise: "ciò, farabuto,

te resti indrio cofà na femenela;

gheto da far l'amore co la sela,

opure se verifica el caso

che te sì inamorà de Tomaso?"

El toso ghe risponde, tuto serio:

" A te rispondo, el dise, cauterio!

A xe fadiga, assè, restare indrio,

ma resto no parché a sia finio;

me toca far cussì parché 'l dotore

- che ghe vegnesse afano par do ore -

el m'à ordenà de 'ndare molo molo

par via del me disturbo al pissarolo.

E mi, par no sbaliare, storzo 'l naso

e resto a far l'onbra de Tomaso".

Sti zovani: se pole dirghe gnente?

Te si on ronpibale dificente

solo parché te fa pecà vardare

che 'n toso, che xe solito strafare,

el resta indrio cofà la coa del musso.

Ormai la relijon la xe on lusso!

ORMAI el morale dela trupa jera sui calcagni. Davanti no se vedea tracia de sterato e gnan de sentiero. Solo on bosco de fajo spetacolare, co on strato de mezo metro de foje seche. Ogni tanto so on albaro ghe jera el segnaleto bianco-rosso che dasea corajo, ma bisognava ranpegarse come le cavare, co la bici in spala. Giuliano continuava a dire che xe mejo on marcà co la piova e Luigino strolicava parlando dela Nove Colli, na classica so strada. Davanti el Mestro egiziano a cacia del segnale e, in coa, Tomaso ghea paura d'i lupi, che ghe n'è anca so sto monte.Ga volesto depì de on'ora par darghene fora. El bosco iera tajà, in alto, da na strada forestale inpolvarà, mabela larga.  Co tuto questo a jera belo che  squasi

le do e la fame fasea novanta. Co l'ultimo gramo de zucaro sol sangue, el protonzin d'i sete arditi s'à ciucià i ultimi du, tri chilometri de salissendi, senpre co i corni al'onbra de on bosco pì belo de staltro. Ala fine, co on sfogo de dissesa tènica fra i faji, s'à presentà el posto de ristoro: on spiazo a risego dela sfalto par la veta, co tanto de tole e banche par la marenda e co na guarnizion de on paro de tosati desperiolà che se fasea el barabeque so on scalin de piera. Prima de partire da lì - se ghea da traversare la sfalto e da butarse zo a rota de colo so on bel sentiereto largo na spana - el grupo xe sta messo a parte de on problema serio. Se pensava al solito ingorgo de buele

de Luigino. No. Ala simia de Ti-ziano. No. Ale robe de Claudio.  No.  E no ghe scanpava da pissare a Tomaso. Renzo..., co calche dificoltà par via dela privacì, el ga confessà che'l fasea fadiga a stare in sela. Parché? Parché proprio sol sentare ghe jera nato on bagolo che ghe fasea on male da morire: e che'l ghea provà la sera prima a desfantarlo co l'itiolo. Gnente. E anca co la pasta de Fissan. Gnente. No ghe xe sta gnente da fare. El jera on bognon, e bisognava tegnerselo...