Oscar, cossa sarà sto Monte Amiata

che te vorissi farghe 'na corsata?

Saràlo, po', 'n canton de paradiso

opure xelo mejo del Monviso?

Ghe ne sarà de posto par girare,

o, inveze, ne faràlo tribolare

par via che, sendo picolo, sto monte

el gavarà do tre stradele sconte?

Te vè de longo ormai da quatro ani

che cognarìa "laorarlo"; te te afani

a far convinto el Mestro, che xe ora

de farlo su, sto posto di'a malora!

Va ben, ciapemo el toro par i corni

e 'ndemo là, prima che te ne storni;

femo sto viajo, 'ndemo a smarazare

sto monte e chi'a vaca de so mare!

Ala partenza sete cavalieri

che montarà dessora ai sete feri,

che ciaparà la pòlvare o la piova

pur de passare n'aventura nuova.

I vivarà suando senza gnole,

vivendo in bicicreta quatro fole:

una par dì, dal luni fin al zoba,

magnando a mezodì co dela sboba

par po' finire in zielo, co na zena

che i assarà co 'a bigolara piena.

Renzo e Renato, soci fondaduri,

verze l'apelo, fasendo i auguri

ala recluta de zeca, Tiziano;

in mezo ghe xe Claudio e Giuliano

seguìi, anca in salita, no a caso,

da Luigino e dal bon Tomaso.

Co sto elenco, no se fa par dire,

la fola sarà bela, a no finire!

MA dopo tuto el so dafare par convinzare la conpagnia a 'ndare sol monte Amiata, cossa falo Oscar? El decide che la fémena no ghe dà le ferie e cussì el finisse par rinumciare al viajo! Ma come, se te ghe roto le balote par qausi quatro ani! Adesso, sol pì belo che la comission ga deciso de adotare l'idea, ti te ciapi e te ste casa? Tuti i preparativi xe sta fati sperando che la prospera no fusse on ostacolo, zercando un albergheto che assicuresse na cusina al'alteza dele speranze de Oscar che, anca se'l se contenta de poco pì de do penete co i scanpi, el xe pur senpre na bona forcheta; parfin le càmare singole, che elo xe delicato e no ghe piase le scoreze de nissuni. Gnente, ala fine l'omo decide de stare casa, co la scusa dela prospera. E par zercare de farse perdonare dala trupa, el dì dela partenza el

se presenta al raduno co na scatoleta de figaìni, caramelete catà tacà al figaro de casa e cavà dala boca ala fameja. Na roba cussì comovente che i sete farabuti col pelo sol cuore i xe partii senza de elo...