|
PIVA
PIVA SONA
Piva, piva sona
to mare va a Verona,
to pare va in preson
par on gran de formenton
BUGAGNO, BUGAGNO
(de Ornella R.)
bugagno
bugagno
vieni fora
co' tre corni
uno mi'
uno ti'
uno al vecio
che xe morto
l'altro di'
DOMAN
DOMAN DOMENEGA
Doman, doman domenega,
la festa dela zelega,
la va in piaza
a conprare la salata,
i piri la cata
i la mete in preson.
DOMAN XE FESTA (da Lino Fornaini
de Treviso)
Doman
xe festa,
se magna a minestra,
se tira el spagheto,
se magna el museto
LA FOLA DE MISTRO INTENTO
Questa xe la fola de Mistro Intento
che dura poco tenpo,
che mai la se destrìga,
ca ti’a conta o ca ti’a diga?
Dìmela.
No posso dirtela, parché
questa xe la fola de Mistro Intento
che dura poco tenpo,
che mai la se destrìga,
ca ti’a conta o ca ti’a diga?
Cóntamia.
No posso contartela parché
questa xe la fola de Mistro Intento
che dura poco tenpo,
che mai la se destrìga,
ca ti’a conta o ca ti’a diga?….
LA VACA DE TONI
La vaca de Toni
ga fato on vedelo
pum, che l’è belo,
lo go visto anca mi.
PIERO SE VOLTA
Ghe jera na volta
Piero se volta,
casca na zuca
Piero se inzuca,
casca el bocale
Piero se fa male,
casca na fassina
Piero se sassina,
casca na zoca
Piero se copa.
TUTU’
MUSSETA
Tutù, tutù musseta,
la mama vien da messa
co le tetine piene
par darghele ale putine,
le putine no ne vole,
el popà ghe le fa tore;
ciama l’Adriana
che sona la campana,
che sona el canpanon,
buta …… Zo dal balcon
(al posto d’i puntini se mete el nome del bocia)
TUTU’
MUSSETA (version de Giancarlo Fontana da Schio)
Tutù, tutù mussetta
la mama vien da messa
co' le tetine piene
da dar a le fantoline.
Le fantoline cria
la mama scapa via,
la scapa sul selgaro,
la ciama el caregaro.
El caregaro vien de festa
el taia via la testa.
La testa sul caliero
e le gambe a l'ostaria!
Parona siora zia, Parona siora zia!
SALTO BIRALTO
Salto biralto
me ronpo el naso,
me ronpo el viso,
salto in Paradiso.
TONI BIGARONI
Toni, bigaroni, bigapesse
caga in braghesse.
SAN MARTIN
San Martin San Martinelo,
poco vin sol caratelo,
pochi schei sol taculin
viva, viva San Martin.
LA BEFANA
La Befana vien de note
co le scarpe tute rote,
col capelo ala romana,
sa no me sbalio la xe to mama.
LA
VECIA S'INTACA
Bujelo,
la vecia s'intaca
la magna
pulenta e cicin,
me paise anca a mi.
ORAZION
Maria e Santa Chiara
inprestème la vostra scala
ca vaga in Paradiso
a védar chel bel viso
che l’è deboto morto
e nissuni se n’a incorto”.
I angeli cantando,
la Madona sospirando,
el Signore in zenocion,
oh che bela orazion.
RIDI MOSCA
Ridi, ridi mosca,
te pagarò na crosta,
na crosta de formajo,
ajo, ajo, ajo.
CAREGHETA DONE
Caregheta done,
che porta le madone,
che porta i angioliti,
stichi, stinchi, stichi.
ARI ARI
Ari, ari,
caga ‘nari,
caga assè
ca semo in siè
( la se disea stuzegando la panza de on pavejo – libellula –
parché
el fesse i ovi…)
SILENZIO PERFETO
Silenzio perfeto
che’l diavolo xe in leto,
che’l diavolo xe su,
cucurucù.
IER’SERA
…Ier’sera, l’altra sera no so quando
go visto na femenela inpiantà sol fango.
Mi la credea na bela puta, go dà na man,
la go tirà ala suta. Invece la jera na vecia mata
go dà on buton e la go butà so l’aqua. (da
Maria e Enzo Peraro)
I TUSI
I tusi del Deserto
i marcia in orolojo,
i magna i fasoi co l’oio
parché lardo no i ghe n’a. (da
Maria e Enzo Peraro)
LE TOSE
Le tose del Deserto
No
‘e xe pì tanto care;
le ghe someja
a quatro ropegare
coi denti voltà in su. (da
Maria e Enzo Peraro)
CHECO BEPE
Me nono Checo Bepe
fasea el caretiere
e al posto dela mussa
el tacava so mojere;
Me nono Checo Bepe
fasea el falegname
e al posto dela cola
el cagava sol legname;
me nono Checo Bepe
fasea l’aviatore
e al posto di’a benzina
el pissava sol motore.
GARIBALDI
Garibaldi entra a Roma
a caval de na pitona,
la pitona ga cagà,
Garibaldi la ga magnà.
MAL DE PANZA
Gheto mal de panza?
Tira na scoreza ranza,
caga on peto tondo
e va via de longo.
MEJO VA IN COLEJO
Mèjo va in colèjo
tote la borsa
e curi de corsa,
ti co i mati
e mi co i frati.
SCULIARIN
D’ARZENTO
Sculiarin d’arzento
che vale zinquezento,
zentozinquanta
la galina canta
canta el galo
risponde la galina
me nona Catarina
sentà so la finestra
co tri cocuni in testa
passa el fante
co tre cavale bianche
bianca xe la sela
adio morosa bela.
BÍGOLI,
BÁGOLI
Bìgoli, bàgol pan gratà,
tote la mussa e va al marcà
el marcà xe za finìo
tote la mussa e torna indrio.
(da Daniela Vian da Mojan...)
INDOVINA INDOVINELO
Indovina
indovinelo
Chi fa l’ovo sol zestelo?
La galina.
Merda in boca a chi indovina.
Ma lo fa anca la pitona,
merda in boca a chi cojona.
TONI TONITI
Toni Toniti
che spaca i paniti
che spaca la paja
Toni canaja.
MI
SO ‘NDA
Mi so ‘nda, come mi,
al marcà, come mi,
go cronpà, come mi
on salado, come ti.
PIOVE PIOVESINA
Piove piovesina
La gata va in cusina
La magna el bacalà
La pulenta resta là.
PIOVI PIOVISINA
( Filastroca in uso in
Istria, mandà da Ondina Lusa de Pirano
)
Piovi, piovisina
la gatta va in cusina
la
va soto 'l leto
la trova un confeto
'l confeto xe duro
la salta sul muro
'l muro xe bianco
la salta sul banco
'l banco xe rosso
la salta in posso
in posso xe aqua
adio comare gata.
VENEZIANI GRAN SIGNORI, PADOVANI GRAN DOTORI...
Veneziani gran
signori,
Padovani gran dotori,
Visentini magna gati,
Veronesi tuti mati,
Udinesi castelani
col cognome de Furlani,
Trevisani pan e tripe,
Rovigoti baco e pipe,
i Cremaschi fa cojoni,
i Bressan tajacantoni,
ghe n'è anca de pì tristi:
Bergamaschi brusa cristi.
FILASTROCHE
DA SAN PIERO IN GU
MARSO SI…
Marso sì, marso no,
basa la tosa e la vecia no.
Marso sì, marso no,
brusa la vecia,
el palo no.
DIGHE DE SI
Dighe de sì, dighe de no,
crepa le vecie, le xóvani no.
Le xóvani on bel conforto,
le vecie na cassa da morto.
Le xóvani on bel gaeàn,
le vecie con la scoa in man.
TROTO TROTO MARSO
Troto troto marso
più bel fiorin che sia
che porta ‘l can al’ombrìa
che porta ‘l can al’ombrà.
La puta inamorà
chi xela chi no xela
la xe la Marieta bela.
A chi ghe la ghen dare?
a…(al mato dale Nogare)
che l’è da maridare.
Tre piè soto l’orno
ghe sonaremo ‘l corno.
BATIMARSO
Bati,
bati Marso,
che’l mato va descalso
cavàeo no morire
che l’erba butarà.
LE FAIVE
Se
le faìve va al garbin
parécia el caro pa ‘ndare al mulin.
Se le faìve va a matina,
tol su el saco e va a farina.
Se le faìve va a sera,
la poenta impiega la caliera.
FILASTROCHE
DA MONTICELLO CONTE
OTTO
invià da Francesco Zanella
BON
ANO
Bon
prinsipio de ano,
150 franchi a l'ano;
a Nadae on'oca,
a fin de ano on porseo,
on granaro de sorgo,
on granaro de formento;
e che el paron sia contento,
che contento sia
el me daga 'na bona man che mi a vao via.
PREGHIERA
PAR LA SERA
Signore, son 'nda in leto
no so se levarò.
Vu, Signore, che lo saì
bona grassia me darì
e de dì o de note
fin al punto de 'a me morte.
Primo par l'anima,
secondo pa'l corpo
e recomando 'requie che possa' a l'anima mia.
PREGHIERA
PAR LA MATINA
Signore, ve ringrassio
de 'a bona note
che me gavì dà.
Spero che me donè
on benedeto santo giorno
la grassia Vostra
sia senpre co mi
e co tuti i me cari,
e così sia.
Gesù, Giusepe, Maria:
Ve dono el cuore e l'anima mia.
'A STORIA DE
LONGAREA
Questa xe 'a storia de Longarea,
curta ma bea,
col capeéto in ciò:
vuto va te 'a conta, si o no?
- NO
No se dise mai de NO
a la storia de Longarea
curta ma bea,
col capeéto in ciò:
vuto va te 'a conta, si o no?
- SI
No se dise mai de SI
a la storia de Longarea
curta ma bea,
col capeéto in ciò:
vuto va te 'a conta, si o
no? ... E SE
CONTINUA FIN A STUFARSE!
LAURETA
VA PAR AQUA (mandà da Livio del parsuto)
La Laureta va par aqua
Ilario ghe va drio
la Laureta ga capio
che Ilario ghe vol ben.
I mete zo el secièlo
i mete zo el bigòlo,
i se ciapa a brazacolo
e i se da on bacin d'amor.
GABINATE (mandà
da Narciso Munari, de Lazise sol Garda)
(5
gennaio, sera, dopo l'ora di notte - questua di capodanno)
... e
vardè soto al solar
che ghe du salamèti al par
portèmene zo uno,
che mi voi magnaaar...
...e vardè 'n de la casseta
che ghe de l'ùa seca
che ghe de quela bianca
portèghene zo a quei che canta
(in caso di successo)
benedèti quei pessolìni
che ven zo da quei scalini
a portarghe le gabinate
a quei che canta
(in
caso di insuccesso)
o gente ostinata
che gnente no i ne porta
caghènghe su la porta
e po scapenghe ia.
ZUGANDO
CO LE MAN
DEO
DEALIN
Deo
Dealin,
sposalin,
panzalonga,
sfregola oci,
copa pioci.
'NDEMO
ROBARE...
'Ndemo robare,
'ndemoghe pure,
e se i ne cata?
A scanparemo
...sa podaremo!
MANINA
BELA
Manina bela
fata penela,
dove sito sta?
Da me popà;
cossa t'alo da;
Pan, vin, late,
gate, gate, gate.
LAVA LE SCUDELE
Lava, lava le scudele
par magnare le tajadele,
lavale ben,
lavale male,
buta l'aqua
sol canale.
|
