Come al solito - l'esperienza insegna - la partenza del convoglio vien dopo le supe matutine e la spesa pa 'l disnare. L'agitazion la se pole palpare, ma el sole za alto mete tuto aposto. Sto primo dì vede ala partenza la beleza de sete aventurieri, carghi de oja, oltre che de zaino e borace. Lelo xe incaricà de portare le carte, za pronto a ogni richiesta del cartografo uficiale e del rajoniere del grupo. No staria ben dirlo, za ale prime righe, ma ghe xe ben tri atleti che stamatina no ga tardìo (cagà, n.d.r.), e questo xe motivo de preocupazion par quli che ghe tocarà starghe de drio. Se vedarà, comunque. Intanto la strada, pena fora dal'albergo se pol dire, la va sùito su de bruto, in parte ala cesa, verso el zimitero. La xe sfaltà, ma le carte promete sterato poco lontan.

 

'Ndando in suso se scumizia a gòdarse za dele vedute spetacolari: montagne inboscà da on cao e la caena dele Alpi Apuane da staltro. Dopo el primo incrocio, ben segnà sole carte, al secondo el tedoforo tenta  za de perdarse. Arquanti can che baja fora da do case sbandonà, fa decidare el drapelo de inbarcarse verso on sterato tipo scajara (Colli Euganei, M. Cecilia; n.d.r.) che in do e do quatro se inoltra sol bosco. Claudio, anca senza majeta rossa, vien presto circondà da na nuvola de tavani che, viste le di-

fese del'omo, i se spartisse fra elo, el Mestro e Leonardo. Ma anca Luigino taca a   s-ciafezarse le culate, come quando che da tusiti se zugava ai banditi e se fasea finta de èssare in cavalo. Renzo sua za chel tanto che i tavani gnan lo varda, par paura de negarse.

Quando che el troduolo se inoltra depì sol bosco, le belve velenose torna indrio, assando arquante tàvare so arquante culate. Dopo na dissesa ...in salita (la jera na salita, ma secondo la guida la dovea èssare na dissesa) 

 

 

 

 

 

 

 

 

 

 

 

 

longa abastanza par preocupare Oscar ca ghissino sbaglià strada, finalmente i cunti torna e la dissesa finta diventa dissesa vera, bela assè, int'on silenzio magico roto a on zerto punto solo da quatro, zinque fajani in vena de xolare via dal cucio, disturbà dal passajo del'esercito de roe.

 Dopo on guado seco - ma anca la guida, stavolta, lo dasea par seco - on sonare de canpanazzi, el tipico profumo dele vache toscane al pascolo e la presenza de du indijeni, mete anca Oscar de bon umore, ormai sicuro de no vere sbaglià sentiero. "Noantri stemo qua de casa e stemo ben cussì", risponde a domanda i du vaqueros, ma no in dialetto veneto. Xe za ora de fare aqua ala fontana del paeseto de Ponteccio, parché el caldo bate quasi come in pianura. No serve visitare el paeseto, anca parché la guida ne manda su par on sterato largo, salitoso e pien de onbra che pare che'l sarà longo 5 Km. Oscar, nonostante el bosco, vede le nu-vole che se ingruma sora el monte e ghe vien oja de fare la danza dela piogia. Luigino, bronbo fin ala megola, el ghe fa da spala: el grupo capisse de vere on par de portapegola al seguito.