Ogni
can mena la coa, ogni mona vole dire la soa...
pag.
1
pag. 2
pag. 3
pag. 4
pag. 5
Ogni
can mena la coa, ogni mona vole dire la soa...
Anca i soldadi taliani i gavaria fato fadiga a catarlo, no solo noantri.
Visita obrigatoria, po' se parte.
Speremo ben.
Sbuchemo so na strada sfaltà, quela che porta a
LAVARONE.
Spiociando in qua e in là, riussiemo a catare, ben
mimetizà, el segnaleto che ne insegna el parcorso.
Ghemo da 'ndare verso on zimitero strongàrico.
" Senpre driti par qua", ne dise na sposa za
vanti coi ani, ospite dela
Magnifica Comunità Di Folgaria da depì de tredese ani, che so fiolo va via anca elo in bicicreta, ma
che desso el xe a laorare e alora elo no ghe xe ma'l vien ...
Senpre driti on tubo.
Mai assàre la strada vecia par quela nuova
'Ndemo vanti a
palpeto, co le man senpre sola nostra cartina e on segnale 100 Km dei Forti ogni quatro crosare.
Semo incazà cofà dele ande.
Ghemo le man ligà e ne toca portare passienza.
"Dove ca semo?",
se preocupa Tomaso.
A furia de cartina e de intuizione
rivemo fora dal bosco sora el paeseto de BERTOLDI,
za in pieno altipiano de Lavarone.
Qua, so on bel incrocio co tanto de parchejo fra le
case, se fa vivo el paleto col segnaleto. I lo mete solo par farlo védare ai
turisti...
Che ghe vegnesse on azidente a forma de onbrela...
'Ndaremo a protestare al'azienda de sojorno, dala
sacrataria co le rece grande e la parola franca.
"Xe ora de
supa", consilia el Mestro che'l consilia anca de magnare solo mezo panin
par via dela salita che ne speta, a intuizione.
Co la panza piena se rajona mèjo. ma anca:
Panza
piena vole riposo...
" Posso pissare ?"
Magnare e partire l'è sta tuto uno.
E qua la se ingarbuja.
Dopo na specie de giro del'oca, in mezo ale vache, so
sentieri segnà da na sorte de pieron piato messo in piè, senza el segnaleto e
solo co la cartina - che Dio la benedissa - riussiemo a rivare vizin al zimitero
strongàrico ca dovìvino catare drio al parcorso.
Na fontanela ne inpinisse le borace e ghe lava le man
a Tomaso e a Renzo, insondonà par via dela caena che la se ghe aingrejà sola
pidivela.
Da lì se inoltremo 'ntel bosco, in direzion, se fa
par dire parché chissà quanti canbi che ne tocarà fare, del PASSO VEZZENA.
Spetacolare su e zo fra i pini, col silenzio che
cresse de volume man man ca 'ndemo vanti.
Quando ca catemo
el cartelo "Passo Vezzena", ciapemo el sentiero e tachemo a 'ndare su.
Dovarìa essarghe tri o quatro chilometri par la zima.
El bosco xe pien de funghi; infati ghe xe parici
grupiti de zente col zesto.
Invidia.
Ruschemo e pantezemo oncora par diese minuti, fin a
rivare ala Baita
del Cangi ( m. 1.370 ).
On spiazo de verde in mezo al bosco, co na casa ben
fata e sarà.
Ghe xe na sposa in squasi bikini, che la ga pena
descargà on zaino grande come ela.
"Tuta da védare", ga corajo de dire Oscar.
Si.
La fa on fis-cio, come on cazadore al can da pena: la
ga passà paura d'i quatro cavalieri del'apocalisse e la ciama rinforzi.
Tuti tedischi, i rinforzi, come la sposa del fis-cio.
Che la ghesse proprio paura de rapresalie?
Ya!
Aufwiedersen, e partiemo, in salissendi prima, po' in
salita fin al PASSO VEZZENA
che'l pare drio spetarne.
Xe squasi le
quatro e semo a 1.402 m. de alteza de montagna.
El passo xe el
confine fra l'altipiano de Lavarone e quelo de Asiago, almanco ne pare de vere
capio.
Vardando i nuvoluni che se ga preparà sola nostra
testa (stando 'ntel bosco a credivino che fusse oncora sole...) magnemo in
pressa na sbrancadela de ueta, na bareta, on pometo, du pomiti, na marmelatina,
do marmelatine e basta.
Partiemo ala volta del resto del parcorso, ma taca
sùito a piovare.
'Ndemo vanti?
Se fermemo?
Spetemo?
Cossa?
Che piova?
Partiemo!
Come par on incanto smete de piovare e le nuvole le se
volta de colpo par corare pì distante.
Xe tardeto, però, cussì decidemo de tajare el
parcorso.
"Scurzemo la bisata", dise esatamente Oscar.
"E desso, dove ca semo?", se confonde
Tomaso.
Qua sì, ch'i ga fato le robe fate ben!
100 kM dei
FORTI
On segnale drio
l'altro ne mena senpre sol posto justo.
A tri Km. da LUSERNA, tajemo zo a destra, incrosando
el parcorso ca ghìvino sbandonà.
Zo, a rota de colo, so nantro carezon de montagna, mai
in pericolo.
Nel fratenpo se ghemo vestii, parché jera frescheto.
Le nuvole de prima le ne jera passà davanti e le ghea
svodà le secie.
Tuto el bosco sgiozava, ma in alto, fra i pini, se
vedea el sole e on cielo celeston.
Piova
e sole, le strighe va in amore.
No se sa se lo
gabia visto anca Tomaso, parché el restava indrio par via che la dissesa la ghe
staria on fià inte'l stomego.
Co on tenporale par davanti e uno che ne corea drio,
ma col sole che ne fasea senpre l'oceto fra i àlbari, ghemo vu solo el tempo de
spàndare aqua e po' par pì de mezora no ghemo fato altro che finire on
sentiero e ciaparne nantro.
A proposito. Oscar ga cacià on zigo:
"Mestro, questo xe de sicuro on porcino", el
fà.
El ghe pissava squasi incoste!
Però el ghea rason, el jera proprio on bel porcineto,
sodo, san, duro.
Gnanca dirlo ca lo ghemo catà.
On encomio solene ale varie pro-loco dela zona de
Lavarone.
100 Km dei FORTI
Anca
sui posti pi scunti, davanti a on bivio ghe jera senpre el so bel segnaleto che
ne ga permesso de no sbaliare pì strada.
A sarìssino oncora là, ormai senza cartina, parché
la se ga consumà a furia de cavarla e metarla sol zaino de Oscar.
I sterati ca inbocavino, uno drio staltro, i jera
senpre pì bei.
Se ghemo incorto de vere fato on mucio de strada
quando che da on slargo a ghemo visto dal'alto tuta la VALDASTICO, dominà da
Est dal versante de Luserna.
"Qua dove ca semo?", se informa Tomaso mostrandose
disorientà.
On spetacolo mai visto.
Prima de lì, semo passà so na valeta, vizin ala
MALGA LAGHETTO, famoso posto dove che la natura la xe assà al so èssare
(biotopo, in talian).
Pecà che proprio lì davanti i gabia messo in piè na
serie de palazuni fora de testa e fora posto.
Chi desfa bosco e
desfa pra, se fà dano e no'l lo sa.
Sfondradi...
Squasi senpre in dissesa semo rivà al FORTE
BELVEDERE,
nantra òpara militare fata dai Strongàrici de prima dela guera par èssare
pronti par la guera.
Enorme, inponente, grande assè insoma.
Anca belo, sol so zènare...
Visto, fotografato e piaciuto.
El
sole magna le ore
El ghea rason, parché jera le zinque e meza e
ghìvino da fare oncora on mucio de strada.
Scavalcando tute le strade sfaltà del posto, fora da
on bosco e drento so nantro, semo passà soto al DOSSO DELLA COMARE rivando a
PRA DI SOPRA.
E qua ghemo corso pì forte del tenporale ca ghìvino
davanti, o che'l ne ghea spetà, fato sta ca se lo ghemo catà de sora.
E proprio alora el la ga molà, tuta.
Na sposa indigena, tegnendose el fazoleto in testa, la
ne insegna on trodiolo par rivare in pressa a Carbonare.
Ma la piova no la saea come farla smetare.
Grazie, parona.
El
stradoleto xe on spetacolo, streto e on fià sbrissoso, ma belo.
In'te on supion rivemo sola sfalto che da NOSELLARI va
su a Carbonare.
E qua la piova la bate sul serio.
Se incapuciemo ala mejo, e tiremo in salita fin a
Carbonare, savendo che pì vanti la sarà pezo.
Smete de piovare quando ca semo a S.Sebastiano.
Vien zo fumara e semo coti.
" Dove ca semo?", tartaja Tomaso par vèdare
se ghe riesse de passare vanti.
Renzo va a palpeto.
Oscar sbufa.
El Mestro anca.
Vardemo l'orolojo: xe le sete e vinti quando ca
passemo S.Sebastiano, par fare i ultimi otozento metri par el Passo del Sommo.
Na trajedia.
Quando ca vedemo la ceseta del Protetore d'i forestali
lo nominemo de boto protetore nostro.
Anca parché davanti a elo finisse la salita.
"Dove ca semo", se ingropa Tomaso fasendose
el segno dela crose.
A ogni modo da lì el decide de scanpare: el ga vanzà
cussì tanta bira che'l se buta in dissesa, spassando de bruto Renzo.
Viliaco.
Bronbi semo bronbi, quando ca rivemo al'albergo, ma in
conpenso ghemo el culo mojo tronco.
Par via del'aqua solevà dala roa dedrio: na secia al
giro.
Par fortuna che se magna ale oto, parché rivemo che
manca vinti, dopo nove ore e diese minuti de sela.
E chilometri 53,2.
A Tomaso ghe fa male el tafanario ( culo,
n.d.r.)
Se consolemo magnando el porcino par antipasto, tajà
fin.
...Na bonba.