|
Contenti assè el dì del terzo giro e sol garaje tuti, gnan on ritiro! Co le drite de Mario, el parcorso el sarìa sta tuto 'nantro discorso: se tratava solo de 'ndarghe drio, sola carta, al segno incolorio. Sùito, la trupa la ga vu piazere de catare i resti de on podere ciamà Sant'Antonio, che za na volta la guida umana ghe la ghea tolta. Da chele parte ghe xe sta el misfato, on tiro che'l novizo, sbuderato, el ga zugà - ofesa ai soferenti! - al malandà del grupo, a Narenti! Tore pa'l zesto on omo trato in doe, che'l pedalava stando sole soe par via dela tugà ciapà so 'e coste, xe sta come robarghe on'onbra a l'oste. Che sia in autostrada che se inpara a ronpare i maruni e far cagnara? Penseve che Tiziano, par spassare el poro Renzo, intento a respirare fasendo na fadiga di'a madona el ga tacà a far finta, bruto mona, de essare na motobicicreta de quele co'a marmita maledeta. L'è sta on afronto, na ofesa grossa pa' on'omo co on piè za so la fossa par via dela tugà ciapà so'e coste. Par forza Renzo 'l ga tirà do croste! |
|
EL xe sta on piazere riussire a passarae pa'l Podere S. Antonio, che sol giro del primo dì no jera sta possibile catare data la precision dele carte. A proposito: la sera passà, l'omo del monte che ne ghea dà le indicazion par sto giro, vedendo la cartina el s'ea messo a ridare metendo al corente i sete artisti dela montabai che la jera tuta sbalià e, co de pì, fata dodese ani fa. Robe da cavarne on pozo! A ogni modo, cartina o no cartina, stavolta el convolio xe riussio a passare par S. Antonio: ghe jera solo i resti. Par rivare lì el sentiero - vardare la fotografia - el parea ricavà so na isola d'i caraibi, par via de na zerta bela sabieta fina sol fondo e d'i albari spenotà. Passà el podere e incontrà la strada par i Pozzaroni, 'nantro resto de vecia cesura, la procession s'à introdà so tri quatro carezuni de bosco, uno drio l'altro e uno pì belo de staltro, fra dissesa e poca pendenza. Xe sta pecà anca solo traversare la sfalto par butarse, par fortuna, so 'nantro trodo de bosco. Da lì ga tacà 'nantra volta el problema del'orientamento Pur riussiendo, co l'aiuto de on ex minatore vedovo da siè misi che in gioventù alzava on quintale co na man, a rivare so on posto ciam case Quaranta e da lì perdarse oncora fin a Saragiolo, la giunta xe 'nda in crisi. |
|
LA passienza ga on limite. El Mestro jera incazà, Giuliano jera smonà, Luigino jera intasà, Renzo indolentrà, Tomaso oncora insonà, Tiziano desperiolà e Claudio senpre incolà (a Tomaso). Se presentava na jornata calda, co na tirada da fare par rivare so sto Monte Penna del pìfaro, co la prospetiva de tornare indrio - senpre che la cartina càncara lo parmetesse - par la stessa strada del'andata. On incubo. Riunion sola strada pena fora da Saragiolo. Che se ciava anca el Monte Penna! Par dove ca 'ndemo?, domanda Tomaso senza spetarse risposta. A destra. Se va a visitare chi du, tri paesiti che se vede sparpajà da chi'a parte so le coline. El xe sta on trasferimento soto tono, on fià parché la strada jera traficà, on fià parché no ghe jera na meta precisa e on fià parché Luigino, par via dela vasca biologica oncora da spurgare, el jera de cativo umore. Jera torno mezodì quando che la colona xe rivà a Santa Fiora, dopo oto chilometri de dissesa che no assava ben sperare par el rientro. El posto, però, jera ai piè del'Amiata e questo, inveze, assava ben sperare. Ghe volea calcossa par darghe na scorlada al malcontento. No se ga pensà de mejo - ma la xe ta na idea folgorante de Renzo - che fare on gireto in sela par le viete del centro storico, belo assè, tuto tirà a spago. E po' supa! |
