Zento proverbi da tegnere sol comodin

A go passà na vita a rancurare tuto el rancurabile sol dialeto, almanco so quelo de le me parte, la Bassa Padovana: de tuto el Veneto sarìa na roba inpossibile! 
   Tuto el fruto del me laóro se pole catarlo so sto sito, a disposizion de tuti. Go volesto, però, darghe sfogo anca a la me oja de dire calcossa de mio, oltre che rancurare e métare qua, so le pagine litròniche... Lo go fato partiendo dai proverbi, che par mi i xe 'na spece de crióla (el picolo saràjo par i polastrini), on gnaro che juta a créssare e a vìvare tegnendo ben ferma in mente la nostra storia, le nostre tradizion, le nostre raìse. 
   Go messo insieme on zentenaro de ste perle de vita, che ne xe sta consegnà da chissà quanti secoli come 'na relìchia da tegnere da conto e da no desmentegare: anzi, da far conóssare a tuti. 
   Sto sforzo in pi, sto sfogo, che 'l ga vu anca el "patrocinio" de la Regione Veneto e del Comune del me paese, Solesino (qua se dise Suisìn...), el xe finìo so on libro: quelo che se vede qua in parte. 
   Go volesto védare i proverbi - come ca go scrito so la presentazion del libro - co on ocio al tenpo che i xe stà inventà, on ocio ai dì nostri e 'nantro ocio (podemo rivare fin a quatro co i uciài...) a le robe de ogni dì che i nostri veci ga za osservà e capìo par noantri. 
   Spero de 'vere fato calcossa che podarà servire a tuti par védare tuto so on colpo el mondo de 'na volta e el nostro, jutà proprio da sti proverbi e ...da come ca li go capìi mi.

Istruzion: come fare par avere el libro...

  2 - Scrivare Nome, Cognome e indirizzo
       postale justo, che mi possa spedire el libro;

  3 - Na volta ricevù el libro, mandare
       10,00 euro conpilando par ben el boletin che
       ghe xe sol pacheto;

  4 - Opure (par chi che ga on conto corente postale)
       fare on "postagiro" sol C/C postale n.
        26473686 intestà a Trevisan Renato;

  5 - Mi spetarò, in fiducia.

  6 - Co 5 libri ve ne mando 6: 1 xe in regalo...